星期六上午睇NBA直播，賽事就冇乜好睇，但啲英文評論就講得幾過癮。美國電視台啲體育直播，資料特別詳盡，乜嘢統計資料都有齊。一樣比較特別，相信係美國獨有嘅，就係凡有新球員（rookie）出場或特別介紹某某明星球員，第一件事就講嗰位球員從乜嘢大學畢業或者讀過書，著名評論員BillWalton（本身係著名球星，UCLA畢業，佢位公子LukeWalton係洛杉磯湖人隊球員，長做後備，球技比乃父相差幾皮）最鍾意講邊位邊位曾經打過UCLA校隊。如果睇NFL美式足球，每位球員介紹，一定講明來自邊間大學。
睇波麻麻，就睇報紙，上星期六全港報紙都報道D4、D6級官員調動，如邱騰華做新聞處長、謝曼怡做行政署長、祝彭婉儀去東京，栢志高去布魯塞爾等等。《大公報》對四位官員履歷介紹得最詳盡，但係全部報紙都冇講，呢批高官喺邊間大學畢業嘅。二十幾三十年前入政府做AO，相信全部係港大生，點解政府新聞稿唔講明白啲呢？
美國官員調動，多有講明大學出身，台灣如此，大陸亦然，偏偏只有香港特區政府從來唔講呢筆，唔知道係有乜原因，唔通背後有個假設，絕大部份AO係港大生（曾蔭權、曾俊華係最顯著嘅例外），所以唔使講？
港大生治港，跟住英國人就做得唔錯，英國人係一流教車師傅，佢哋啲一流徒弟如曾特首、任志剛，都出身自最高班嘅郭伯偉、夏鼎基財經系統，現在睇番，又真係幾高班，而其他政務系統出身嘅，人才凋零，所以話名師出高徒，確係冇錯。曾特首因為不是港大出身，佢嘅特首辦公室幹員，港大生竟然佔少數，例如辦公室主任曾俊華，私人助理陳羿，及三位未公布嘅新聞統籌員何安達、特別助理陳克勤、中央政策組顧問劉細良都唔係港大畢業嘅，睇吓呢班人將來在官場有冇前途？