呔歲晚進駐禮賓府，成為錦鯉園新主人，大年初一已經急不及待搞團拜，但就係小規模嗰隻；今日就做大騷，請晒各界社會人士去參觀吓間大宅，睇吓杜鵑花。好多政界代表，例如立法會同行會成員，都已經收到帖，今日傍晚時分去禮賓府飲番杯水酒，當係團拜又好，入伙酒又好，最重要都係同大家聯誼吓，希望新一年和和氣氣咁啦。
董生董太或出席
八方知道，老董都在邀請名單之列，不過，真係無人知佢會唔會到。昔日自己宴客地方，今日變成人哋官邸；明明做緊主人家，忽然又成為賓客，一年間人面全非，面對曾府棵桃花，應該百般滋味在心頭。
董太可能重多感慨，事關當時董太負責禮賓府陳設布置，又借咗好多黃花梨家具同古董返嚟擺，但煲呔一入主，即時改頭換面，除咗地氈同窗簾布，少少董太style都唔肯要，重臨舊地，董太又能不神傷？萬一到時曾生又熱情擁吻，更加唔知點好。
之不過，就算董生董太唔到，香港咁多俊傑，實有好多人會畀面捧場嘅；但最受歡迎嘅，可能就係個錦鯉池而非煲呔本人。好似民主黨咁，雖然因為政改方案同煲呔擘咗面，但一單還一單，人哋請到，自然要好有禮貌咁到一到，好似肥仔明同單雞都話會去，當然，呢亭場合梗係唔會同煲呔密斟，人頭湧湧，有乜好傾呀？反而對佢哋嚟講，可能個錦鯉池重吸引，嗰時煲呔特登斥資卅萬裝修，俾立法會鬧到飛起，都要睇吓正唔正。
一向反對禮賓府建魚池嘅工聯會鄺大狀，就真係好唔好彩喇，咁啱撞正自己有CASE要跟，兩者相比，梗係自己嘢緊要過煲呔一個握手啦，除非臨時抽得空，咪就無緣親眼睇睇呢個魚池啦。
蔡菜子帶酒到賀
好彩，重有啲人唔會令人遐想破滅，其中一個係民建聯蔡菜子。雖然蔡菜子曾經話過煲呔係靠運氣上位，過佢一戙，但煲呔其後好多舉動，例如喺街頭嚟個深情擁抱，都令蔡菜子冧晒，大家點會重有嫌隙。
蔡菜子早前喺安徽合肥市，就特別買咗二十箱，每盒六支嘅「蔡氏家酒」返香港；雖然唔係自家出品，但同姓三分親嘛，而隻酒香港無得賣，佢變相係獨家代理，所以都好矜貴，佢話如果有機會，今日會攞去禮賓府畀煲呔試吓㖭；你估佢會唔會酒不醉人人自醉呢？
爆料熱線：29290000、27860099
報料傳真：26239278
報料電郵：[email protected]