【本報訊】特首曾蔭權未能成功推銷政改方案，首份功課「肥佬」收場，更因而放棄協助中央與泛民主派溝通。不少聽眾昨天致電電台烽煙節目，批評曾蔭權心胸狹窄，認為曾蔭權作為父母官，應以豁達心情包容民主派，有聽眾更斥他向錦鯉學習節制脾氣做法幼稚。
「每一步都為自己」
不少聽眾昨致電商台節目《在晴朗的一天出發》，向曾蔭權連番發炮。聽眾劉小姐直指曾心胸過度狹窄，指出「作為父母官，我哋對你有期望，（與民主派溝通）如果出現問題，應該搵個原因出嚟，鍥而不捨搞番掂佢，唔應該咁快就灰心，做父母官應該有豁達心腸包容市民。」
聽眾何女士則直斥曾蔭權「每一步都為自己」：「我噚日嬲到死呀，佢喺度諗緊點樣安置啲錦鯉，但香港市民𠵱家重水深火熱，有無搞錯呀？你支我哋咁高人工，（竟然）畀啲錦鯉做你模範？幼唔幼稚啲呀！」
有聽眾則於港台節目《千禧年代》中指，理解曾蔭權因未能通過政改方案而感到不開心，但認為他不應因而灰心，放棄協助民主派溝通，林先生指，「佢坐得呢個位，咁易發脾氣、勞氣，就有失坐呢個位嘅能力。」
譚太更力撐民主派按《基本法》處事，要求普選時間表做法正確，「佢（曾）夾硬將《基本法》啲嘢攞走，民主派只係正路做嘢，有咩唔啱？」
劉慧卿憂影響中央
前綫立法會議員劉慧卿及民主黨主席李永達齊對曾蔭權放棄溝通表示失望，劉慧卿擔心曾的取態會影響中央決定，「如果特首心情咁唔好，佢唔支持、唔幫手，佢哋（中方）又點去做呢？」李永達則指曾尚有十七個月任期，「重可以做好多嘢」，勸他毋須過早放棄。