美國加息，香港冇跟，業界認為利好樓市，但屯門有炒家冇咁樂觀，覺得大部份銀行唔加，係因為熱錢，一旦流走，美國三月若再加息，香港分分鐘追加，有貨喺手，走為上着。
另外，呢班炒家，有啲貨擺咗大半年賣唔去，見𠵱家氣氛好番啲，重唔乘機沽貨，慢慢至搵番啲價平兼成交期長嘅貨都未遲，總之保留現金最穩陣。
唔少炒家及投資者係咁諗，形成近排好多炒家貨成交，有啲平手都冇計。
屯門兆康苑E座低層二室，五百六十九呎，炒家舊年中用逾六十二萬入貨，裝修後叫八十五萬求售，近日以近七十四萬成交，扣埋使費，近乎平手。呢個炒家重有兩件居屋，都係諗住平手算數。
另一個，炒開私樓，舊年七月用百五萬，入咗件叠茵庭一座低層C，放百六萬，但冇人吼，日前只能以一百五十五萬賣出，都係得微利。佢高峯期揸三四件貨，𠵱家賣剩一件。
祥益謝澤銘話，近日雖然多炒家出貨，但底線係蝕少少，蝕得多就揸住先。