寵物權益大過天，無論係狗仔貓仔抑或魚仔，都唔好當佢哋係玩具，貪得意玩吓就算。好似煲呔咁，前日接受電台節目訪問時大談養魚之樂，但真正愛好寵物嘅人士，一聽就知道佢無全心全意養錦鯉啦，邊有主人咁衰，外遊一個禮拜，都唔搵朋友或者親戚幫手餵吓魚，任佢哋自生自滅呢？又邊有主人咁無情，搬屋後發現無魚池，就求其送畀其他人就算？
重有呀，煲呔用錦鯉節制脾氣，即係只當佢哋係一件普通工具，完全無尊重過佢哋都係活生生嘅獨立個體啫？
煲呔呢番「養魚論」，點起好多寵物界衞道之士嘅火頭，「108行動小組」就強力譴責煲呔以上三宗罪，佢哋警告煲呔，一星期唔理寵物，任佢哋自生自滅嘅行動，足以導致寵物被「謀殺」或「蓄意謀殺」，真係好絕。
小組強烈呼籲煲呔做個負責任嘅主人，希望佢以身作則，做個榜樣畀市民睇，堅守一生承諾，唔好因為搬屋而遺棄寵物，否則……雖然小組無講明，但最大機會，梗係再帶貓貓狗狗去禮賓府踩場，以行動展示寵物界嘅團結力量啦。
爆料熱線：29290000、27860099
報料傳真：26239278
報料電郵：[email protected]