呢輪高調女星嘅風頭真係一時無兩，班富豪個個俾佢玩到氹氹轉，馮仁昭有時都覺得啲有錢佬幾得意，咁鬼鍾意做襟兄弟，高調女星搭上咗一位商人後，以為佢會專心一個啦，點知佢又走去辣另一位更重量級嘅富豪，呢位富豪最初都諗住同怕老婆商人撞口撞面，唔想搞佢條女，但佢條女成日投懷送抱，咁喺食得唔好嘥嘅情形下，咁就粗粗地包咗佢三個月，如果表現良好就續期，表現唔好就係咁先。
終止合約
高調女星執咗支好籌都係死性唔改，係都要博見報，富豪自己咁多條女，高調女星重成日搵住佢嚟搞，搞到佢身邊其他女同個正室都詐型，富豪唔想再俾女人煩，點會唔怕咗佢，所以期未滿，就話要同佢終止合約啦！高調女星之後想轉頭搵番商人，但人哋都怕鬼咗佢啦。