保險機構近年積極擴充，搶市場佔有率，益咗寫字樓大業主，盈科保險預租上環永安中心九層十八萬呎，成為舊年最大單、最轟動嘅寫字樓租務，佢哋租開嘅旺角新世紀廣場十萬呎，聽講瑞士蘇黎世保險傾緊，想連命名權租埋，月租講緊二三百萬。
蘇黎世九八年與鷹星保險合併，躋身香港十大，𠵱家總辦事處喺鰂魚涌太古城中心三期十五至十七樓，喺尖沙嘴海港城世界金融中心南座七樓有個營銷處，鄰近港威大廈一座三十四樓部份係佢哋嘅專業發展中心。
線報話，佢哋計劃擴充，同時將幾個唔同嘅寫字樓集中喺一度，方便營運，因為新世紀廣場喺正火車站，租金平過港威，又可能有埋命名權，對強化形象有幫助。
今年寫字樓租盤音樂椅遊戲，相信有排玩，如果蘇黎世單deal成事，太古與九倉要搵過租客，租金可以三級跳。
電郵地址：[email protected]