盛智文白手興家，又將蘭桂坊搞得有聲有色，政府請佢幫手睇住海洋公園個檔攤，其實係一個唔錯嘅配搭。好多香港人想見吓盛老闆究竟可以點樣帶領海獅同熊貓迎戰米奇老鼠，順便學吓嘢。
噚日盛老闆話海洋公園農曆年期間一樣爆棚，其實暗寸迪士尼管理欠佳。不過利世民就覺得盛老闆去得唔夠盡，如果利世民係佢，就一定唔止要贏牙骱，一定要贏盡生意同人心。
其實香港喺新春黃金周之前，已經有唔少消息話今年來港「遊園」人數大增，呢一點相信無論迪士尼同海洋公園都一定略有所聞。當然，海洋公園除咗要為自己個檔攤做好準備，更加要有多一手準備。
年初二迪士尼爆棚，如果利世民做海洋公園頭頭，就一定喺年初三準備定一隊特擊隊隨時候命，只要第二日迪士尼又拉閘，就即刻派旅遊車去大嶼山，沿途威威司令宣布︰「各位同胞咪勞氣，海洋公園歡迎您。」
一石三鳥救旅遊業
如果威威司令可以帶埋凍飲同即日入場優惠券，真係可能會即刻解決迪士尼門外混亂，報紙第二日頭條分分鐘會寫︰「威威司令真係醒」。平日咁做，當然會惹起米奇把火，不過今次擺明出師有名，不但為幫迪士尼解圍，更加挽回香港旅遊業嘅面子，迪士尼管理層幾嬲都惡唔出樣。
海洋公園𠵱家爭取緊政府再注資擴建，如果盛老闆可以識得機動應變，唔好話嗰區區幾十億，分分鐘連周梁淑怡個旅遊發展局都畀埋佢打骰。到時盛老闆就可以提出，要政府將兩個國企主題公園一次過交晒畀旅局睇，而兩間主題公園嘅收入就資助旅局獨立運作，三個公帑黑洞就從此自負營虧，政府唔再同旅遊業有甚麼瓜葛。
聽聞盛老闆都係自主市場信徒，如果佢真係肯出手，以呢條一石三鳥計解決香港旅遊業嘅困局，咁就真係畀個大紫荊畀佢都抵！
利世民