模特兒出身的楊愛瑾（Miki）是攝影師的捕捉對象，久而久之，她亦被薰陶而愛上攝影。在五樣珍貴物品中，Miki表示相機是其最愛，會隨身攜帶，至今親自拍攝的作品已收藏了四十本之多。除此之外，前男友送給她的明信片，她亦如珠如寶，並自言喜歡有心思的物品，代表了別人對自己的心意。 採訪：王連連 攝影：陳俊強
珍貴劇照簿
「我之前拍咗部電影《B420》，套戲嘅相好少，本劇照簿得我同導演有，最初係印畀所有演員嘅，但後尾冇印到，呢本劇照連李璨琛都冇㗎，所以我覺得份外珍貴。我冇特別貼起呢啲相，費事整爛嘛。」
愛情明信片
「呢啲幾米明信片係我前男友送畀我嘅，我好鍾意幾米嘅畫，而呢啲明信片係四、五年前生日時，男朋友送嘅其中一份禮物。明信片入面重寫咗好多嘢，你知男仔好少會寫嘢，我覺得佢好有心思，覺得好sweet，所以我都好珍惜，不過平時唔會特登攞嚟睇，只係收埋。」
心拼心壁畫
「雖然好多歌迷成日送禮物畀我，但我其實唔想佢哋嘥錢，不過有啲歌迷親手做嘅嘢真係好有心思，令人好驚喜，好似我好鍾意PostPet呢個卡通公仔，有個歌迷就親手摺啲心心紙，然後砌成一個公仔畀我，佢咁好心機，所以我都將佢掛喺牆度。」
模特兒回憶
「我將初入行時嘅模特兒相整成剪報，重收藏得好好。嗰陣我好鍾意做模特兒，因為好鍾意影相，又可以扮靚，雖然呢本剪報都唔齊，但因為有啲係我家人幫我剪低嘅，所以我好珍惜㗎。」
四圍影相機
「可能俾人影得多，搞到我都鍾意影相，我𠵱家會隨身帶住部相機㗎。喺咁多作品之中，我最鍾意嘅一張係喺台灣影嘅，嗰日喺街度，望上天有好多雀仔，於是即刻影低。如果第時有機會，我真係希望可以出到一本相集，我最鍾意就係影風景或者死物。」
