畫家Ｂ本係人之患，在官方機構做講師做得好哋哋，約三年前因不堪學校不斷要求增值（即係一人兼多幾項職務，薪水不變），嬲起來一走了之。經濟不景之際，行將四十歲而唔食公家飯，人人話佢儍，點知儍有儍福！適逢呢幾年政府學人講文化，鼓吹創意工業，能畫畫，懂設計，又識教埋理論嘅藝術家，原來周圍有人請，藝術Ｂ有MFA兼MA（設計）兩個碩士學位，講西方藝術史、印象派、抽象派，如數家珍；講平面設計，有大學沙紙文憑；講畫番幾筆，佢十幾年前已有抽象畫參加畫展；於是乎一出官門，路數更多，雖然今時今日，冇學校肯請長工，只簽散約，畫家Ｂ以「自由人」身份，到處教書，由大學、大學校外進修課程，以至到甚麼中心，甚麼訓練局開班及私立設計學校都請佢做散工，甚受歡迎，加加埋埋，薪水少唔過以前，自由度就大好多。
畫家Ｂ做咗三年自由人之後，經驗已足，索性在火炭區工廠大廈租下單位，作畫室及私家授徒之用，咦，生意唔錯噃，但有啲學員話火炭遠些少，唔肯去，於是畫家Ｂ更大膽啲，在灣仔謝斐道再租多一層全層寫字樓（其實只得一千平方呎），打正設計招牌，年初四正式揀正吉日良辰，切燒豬開舖，叫埋左丁山上去食燒豬，成班親友到賀，熱鬧得很。
呢門生意有冇得做，好難講，不過求人不如靠自己，自信有料者，焉可不試試自己嘅才能，有多啲私人空間，唔使聽官僚之言畫家就可以有更多心情去創作。話唔定每年畫番幾幅好畫，待日後成名，就值錢到極。
大概香港人嘅錢多咗，又或者係內地人來港買油畫，油畫有價，一啲畫廊進駐中環地舖，令人矚目。譬如都爹利街原浙江第一銀行行址，地方好大，竟然由一間畫廊承租，大馬路中建大廈對面太平行地舖，早已在年幾前由一家畫廊租用，畫廊以前多數係樓上舖或在荷李活道一帶，𠵱家入駐最旺盛區域，可見油畫值錢兼有客路，畫家Ｂ如果食正條水，可以講事業只係剛剛起步。