講開飲食業，除咗美心，稻香近年個勢都好勁。華華聽行內老友講，進取中式酒樓中，中上價有利苑、大眾化就係稻香，他日佢哋上市可以諗諗。
稻香打響名堂靠「一蚊雞」。華華聽過一個故事。話說當年佢哋宣傳一蚊一隻雞，有個記者扮客去玩嘢，入到酒樓坐低，同部長講話我要半隻雞、一碗白飯。點知個部長二話不說就落單，記者亦照食。跟住埋單，半隻雞收五毫，連茶及一碗飯十皮有找。個記者之後表露身份訪問經理，登晒報紙，證明一蚊雞係冇取巧。
飲食行難做係人都知，打響招牌難，要留住啲客亦唔易。稻香今年年初一，如常營業，每個幫襯嘅客都有十蚊一封利是（圖），啲客好受。當日全線大約有六萬人次幫襯，即係派咗六十萬出街！呢啲招數，唔係好多人學得到。