成龍同古天樂噚日喺中環拍攝新片《BB計劃》，成龍喺現場大派利是畀記者，就連路過嘅小朋友都有份，佢同馮仁昭講今年派利是，要派成三十萬，認真誇張。
噚日開工時，成龍因為同劇中嘅BB唔見幾日，個BB仔唔認得佢，佢惟有即時發揮慈父本色，扮鬼臉、錫臉，出盡法寶嚟𠱁個BB，連佢都忍唔住呻話：「陰功，要扮小丑嚟𠱁佢。」
大讚古仔身手
成龍同馮仁昭講𠵱家已經習慣咗同BB相處，有記者提議佢追多一個，佢就即刻將個波推畀兒子房祖名，重話唔介意做狗年爺爺。不過佢事後又補充希望祖名以事業為先，而且佢又想同祖名有更多時間傾偈，重話唔介意同祖名一齊接受清談訪問，節目最好可以互插㖭。
身為該片動作導演嘅成龍大讚古天樂拍攝動作鏡頭時好穩定，同以前合作過嘅謝霆鋒同蔡卓妍（Sa）好唔同，佢重彈阿Sa唔使埋位時就掛住瞓覺。
