陳寶珠前晚在山長水遠的亞洲國際博覽館舉行音樂會，不少嘉賓對新場館都怨聲載道，建築師出身的趙世曾表示不明為何場館與停車場之間的距離要設計得如此遠。倫永亮則不滿現場指示不足。
陳寶珠前晚與香港中樂團在機場附近新開幕的亞洲國際博覽館Arena舉行音樂會。
捧場的嘉賓有梅雪詩、譚炳文、李香琴、毛舜筠、倫永亮、趙世曾與女友Wendy等，由於是新場地，路途又較遠，前晚不少嘉賓都提早在兩小時前抵達，以免遲到，琴姐與炳哥更是一起駕車到來，他倆在六時許已抵會場。
離停車場距離遠
琴姐表示：「我哋自己揸車嚟，又唔知有幾遠，所以咪提早嚟，原本想喺呢度食埋飯，點知全部係快餐。」當他倆想駕車轉往機場的食肆晚飯時，場館有工作人員請他們入了貴賓房。
身為建築師的趙世曾，對這個新場館也是滿腹牢騷，他表示：「我本身係Architects，唔明點解場館同停車場距離咁遠，個場館外形就過得去啦！今晚嚟捧寶珠場，因為佢係天才藝人。」
而倫永亮則自行駕車抵會場，他見到記者時嘴扁扁訴苦說：「剛才我揸車入停車場時，條車龍長到死，等好耐先入到去泊車，泊完想行番出嚟，但睇極都冇指示牌，我行咗六、七分鐘先走到出嚟。」
新場地如水族館
至於毛舜筠就坐親友車到來，她覺得這個新場地猶如水族館，她說：「呢度講嘢，好似焗住、焗住咁，不過我好鍾意寶珠姐，所以山長水遠一樣要嚟捧場。」
前晚音樂會約遲了二十五分鐘才開始，有戲迷用三十六張一百元紙幣造了一個燈籠，準備送給寶珠姐。而寶珠姐在表演至中場時，突然出現幾十秒沉默，原來她忘記台詞，事後她在中環麗嘉酒店的慶功宴上說：「頭先因為唔記得要先講台詞，然後指揮先會起音樂，所以突然沉默咗。呢個新場館好大，我係第一個嚟做騷嘅嘉賓，其實個設計唔錯，但個後台冇特別通道，唔似得紅館咁方便，呢方面就要改善。」
對於有位名叫PeterChan的男士，在報章上以四分一版篇幅預祝寶珠姐音樂會成功，問寶珠姐此君是否追求者？她笑說：「我都唔認識佢，不過有人咁做，我都幾驚訝！」
採訪：馬建華
攝影：仇志德
