有政黨噚日話春節要「綠色」，又話大家換新銀紙封利是及用禮物紙包嘢要斬3400棵樹。講呢啲嘢，趁禮拜日冇新聞博吓見報，本來冇乜所謂，但就遲咗少少。換新鈔呢個題目，金管局任總裁過年前一早都講晒啦，重在各大銀行貼晒海報呼籲人換少啲。不過冇乜效。
華華都好贊成環保，今年亦響應任總呼籲。不過聽聞各大發鈔銀行重有好多新銀紙印好咗，放在金庫等出街，唔換新鈔點去得晒呢？又如金管局自己出嘅核突紫色（因為佢用咗紫色，所以啲新50蚊要改用綠色？）10蚊紙，唔快啲換有人可能唔高興噃。
邊個？財神爺唐英年囉，香港嘅銀紙由三大發鈔銀行發行，簽名嘅係銀行大班。獨有呢一款10蚊紙由政府發，上面由財爺同任總簽名，好威啫。
但係華華一直用嘅10蚊，上面簽嘅名重係梁錦松，係咪有啲令人尷尬呢。卒之今年新年收到新10蚊，唐英年總算名留紫蟹。咁你叫人換少啲新鈔，係咪唔想唐司長光宗耀祖先？
李華華
