呢個世界有兩種人，一種好鍾意留喺香港過年，另一種則好唔鍾意留喺香港過年。我當然屬於前者，我認為過年時嘅香港最好玩，唔使諗都已經大把節目，團年飯、行花市、拜年、話事啤、蔴雀、射龍門、魚蝦蟹、大細、打枱波、睇賀歲片，最最好玩嘅係忙碌嘅香港人真係肯喺過年呢幾日停落嚟，完全唔講返工嘅嘢，冇晒平時嘅工作壓力，鍾意玩幾夜就幾夜，唔會聽到第朝要起身返工或公司有嘢未做完之類嘅掃興說話，大家日日見面都係飲吓酒、賭吓錢、講吓笑，生活過得非常充實。
至於唔鍾意群體活動嘅人就一定唔鍾意喺香港過年，因為嗰幾日真係冇乜嘢發生，連報紙都細份咗，除非咁生性趁空閒搵本書讀吓又或者學番門手藝，否則日日坐喺屋企都真係幾悶到抽筋。
另一個喜歡在香港過年的原因係因為電視經常會播出自己以前拍嘅賀歲片，曾經有一日無綫同有線同時播出《行運超人》，電影結尾部份提及西九龍將會興建一座雀仔形歌劇院，於是朱鵲便與對岸的靈龜形會展相對唱，香港便會興旺。當時西九文化中心設計比賽的得獎作品確是一座類似雀仔形的建築物，亦問過蘇民峰，在風水學來說雀仔形建築物確實是大吉大利，估不到的是兩年後的今日，西九設計藍圖尚未落實，不如就用番原本嗰個啦，貴少少但係又靚又利是，如果唔係又整座好似大陸樓盤嘅中央圖書館就篤眼篤鼻。