地產代理違規，除咗影響公司聲譽，又會受到地監局懲罰，以及被受損一方追究責任，可大可小。咁若果依足規矩做嘢，咪唔使擔心囉，但係前線為咗扯單，怱忙間有時會掛一漏萬。
祥益地產今年着力推行「零瑕疵」計劃，特別印製一批文件夾，裏面有常用嘅條文範例、常用嘅文件如合約同委託表格等，咁喺促成交易過程中，就萬無一失啦。
另外，後勤部門收到前線交嚟嘅文件，會再作檢查，做執漏工作，實行雙管齊下。
祥益地產業務發展經理梁美怡話，計劃推行一個月，工作效率提高，出佣都早咗。
佢補充，地監局對業內人士要求不斷提升，市場又變化快速，有必要推出唔同嘅計劃配合需要。
樓宇交易涉及嘅銀碼，動輒都幾百萬，代理行梗係應該要推動前線做好本份，提供專業服務，咁至可以達到雙贏局面。
電郵地址：[email protected]