美心第3代接班人伍偉國係番書仔，英文誇拉拉，廣東話就認真麻麻，但接掌咗家族生意5年，都有啲成績！
佢話聖誕去完泰國度假，但曬極唔黑，真係唔講都冇人知；農曆年就留港消費，之後會一直忙到年尾無假放，事關今年係集團50周年，有大把新搞作，但家吓唔講得住。
商業秘密唔講得，但佢就笑住話今年農曆年市道好好，所有員工平均加3%人工，人人都有花紅分，早前收購咗馬局長嘅元氣壽司，新主題餐廳仍會密密開，暑假就有兩間，一間喺利園，另一間喺山頂，所以一定會增聘人手。
伍公子話，今年主力引入外地品牌食店，一般傾幾個月就得，難度唔係太大，但傾之前，佢一定會做好多市場研究，重會親自試食，要過到佢個關先至有得傾！好似暑假開張嘅Larry's牛扒屋咁，就係因為佢鍾意食牛扒，每次去美國都會幫襯，所以促成呢個Deal！