李蘢怡（Tiffany）的五件珍藏物品包括豹紋情侶銀包、銀手鏈、崩后骷髏頭戒指、Q版怪人匙扣及Hipo河馬公仔，其中手鏈和銀包帶出情與義值千金的小故事。當年Tiffany為了圈外男友Chris，捨棄工作，但對方另結新歡，拋棄她。雖然情已逝，但昔日與舊愛拍拖遊日本買的情侶豹紋長銀包，Tiffany至今仍然日日用。至於銀手鏈，是閨中密友郭慧所送，Tiffany十分珍惜這段友情。
情侶銀包
「我好鍾意豹紋，亦都鍾意BountyHunter呢個牌子，年幾前，喺日本原宿見到呢個牌子嘅長銀包，綠色豹紋好型，嗰時同ex-boyfriend一人一個，買咗之後每日都用，我唔care以前嘅事，亦都唔會因為用呢個銀包而諗起佢。」
友情手鏈
「呢條DeepAnger手鏈係郭慧送畀我，嗰時我戴住兩條鏈，右手嗰條係男仔送嘅；左手嗰條就係郭慧買畀我嘅聖誕禮物，我一路當佢係姐姐，佢話：『你戴住兩條鏈，一條係友情，一條係愛情，你揀啦！』結果我淨係戴佢送畀我條鏈。」
蹺鼻河馬
「我鍾意Hipo好耐，由以前住順利邨到𠵱家，都有四、五年，覺得好得意，鼻哥凸起，有時我會幫佢撩鼻屎㖭。呢隻Hipo係fans送嘅，揸車都攬住佢。屋企重有好多隻，有個長形似臘腸嘅攬枕，晚晚攬住瞓。」
偷心匙扣
「我同朋友去日本買BountyHunter嘅嘢，之後店員送咗呢個怪人公仔匙扣畀我，個公仔度寫住thankyou，唔係個個客都送㗎，重有個店員又型又靚仔㖭！」
骷髏巨戒
「我右手戴住呢隻VivienneWestwood戒指又係當寶㗎，買咗幾個月，價值三千二百蚊。試過唔見咗隻戒指兩個禮拜，搵完一輪先知放咗喺化妝袋，失而復得就更加珍貴。好少見咁大個骷髏頭戒指，好型！」
採訪：朱倬誼 攝影：陳偉權 化妝：JessicaChan
髮型：EveChiuofChin.G 服裝：PinkMartini 場地：玩具反斗城
