有一日利世民聽某財經演員講「股仔」，節目邀請咗特區馬時亨局長做特別嘉賓。雖然隔住大氣電波，但仍然聽得出馬局長對小投資者嗰份關切之情。
呢位官員重複又重複咁叫投資者要小心風險，佢重話︰「好似呢啲節目講嘅認股證，投資者一定要小心。」如果我係阿財經演員，一定好後悔請咗呢位嘉賓嚟同自己米飯班主唱對台戲。
窩輪無錯係高風險，但始終明刀明槍。有人擺明當正炒輪係賭錢，求其炒個「冧巴」，就算輸乾輸淨都係心甘情願。窩輪風險再高，點都高唔過一場十幾隻馬得一隻跑出。馬局長既然咁討厭高風險活動，點解特區政府竟然會畀佢掌管財經及庫務局？不過話說回頭，就算做文娛康樂都有風險，恕利世民諗唔到有乜嘢職位係唔需要面對風險。
有炒窩輪嘅朋友都知道，窩輪莊家先至係市場嘅最大問題。不過特區政府處理問題，永遠都係管雞仔唔管麻鷹。小巴司機危險駕駛，特區政府就重罰唔佩戴安全帶嘅乘客。窩輪莊家手段欠公道，就嚇小投資者。𠵱家局長建議，要小投資者好似英文科老師一樣，考咗基準試先至有資格炒窩輪，算係做咗啲嘢保護投資者喎！
何不檢討一市獨大
高官侮辱市民智慧唔緊要，反正市民都唔會在意。不過希望馬局長明白，就算考咗「窩輪基準試」，始終係投資者保護自己嘅利益，唔係偉大嘅特區政府嘅功勞。
如果馬局長真係希望市場透明度提高，就要認真檢討一市獨大嘅港交所。香港股、期、輪市場唔少問題，都係因為無競爭嘅壟斷而滋生出嚟。馬局長既然可以掌管財經及庫務局，無理由連呢個咁簡單嘅經濟道理都唔明。
唔好再「唔管麻鷹管雞仔」，唔該快的郁手對付一市獨大呢個問題，除非馬局長想俾人叫做「雞仔局長」！
利世民