上周五晚，美股一開就跌，收市前兩個幾鐘頭，油價跌到即市最低，杜指有幾點進帳。但去到尾，油價升0.73美元，杜指都係以負數埋單，唔見58點。政治因素左右油價，美股受油價拖住。狗年港股，已連跌3日，恒指323點化為烏有，外圍如果唔妥，港股亦會再跌，但已跌咗逾300點打底，再跌啲，例如百幾點，則喺低位博反彈，買恒指C輪。
恒指C輪9892：喺低位，博恒指C輪9892。隻輪5月尾夠鐘，輪價24.1仙，溢價2%，槓桿率16.4倍（有效10.5倍），引伸波幅19.8%。恒指跌100點計，隻輪理論跌幅7%。另1隻可以考慮嘅係2209，輪價20.2仙，波幅同9892相若。
照睇港股暫時向下多過向上，但事情往往出人意表，炒恒指輪，臨場執生。望吓日經指數，睇住亞洲時段油價點走，可能有必要。
中企指數C輪4479：H股近排升得緊要，已露疲態，繼續睇跌嘅話，當然可以搵啲P輪短炒，但P輪溢價普遍唔低，難以落手。勉強要揀，揀4484。
另1個做法，吼H股指數再散啲，買中企指數C輪，對象係4479，輪價28.5仙，8月尾到期，溢價唔算高（5%），槓桿率8.7倍（有效5.9倍），引伸波幅26.5%，殺傷力與爆炸力唔算太大。
章盛