林家棟與田蕊妮近期因合作拍戲兼打麻雀而成老友,日前二人應節到商場玩金狗,家棟更與田蕊妮搶着走到桃花下行桃花運,由於田蕊妮對首年封利是大感頭痛,故家棟即場教授她封利是的秘訣。
林家棟和田蕊妮(大塊田)最近因合作電影《超班寶寶》而成為老友,前者說話啜核,後者近得老公杜汶澤多亦伶牙俐齒,難怪兩人惺惺相惜,日前為應節還專程到太古城商場玩金狗,其間家棟走到桃花下,表明想行桃花運,想不到大塊田也不輸蝕搶着到花下兜圈,並笑說:「桃花可以代表好多嘢嘅。」
輸錢稱孔融讓梨
其實大塊田與家棟在拍戲前才剛認識,緣自攻打四方城,大塊田說:「幾個月前識佢嘅,起緣喺張麻雀枱,打過一場牌,佢好好打,牌品冇得頂,但牌章就唔夠膽講,嗰晚佢輸錢,我係技術性擊倒佢。」家棟卻跟她鬥嘴說:「細個時學識孔融讓梨,第一次無謂咁盡,千幾蚊,大家食餐飯囉。」
發夢三萬唔夠派
家棟又稱過年會到大塊田寓所拜年,向她及杜汶澤𢭃利是,婚後首年派利是的大塊田就愁眉苦臉,原來她連發夢也想起派利是,她說:「我有晚發夢問我老公,話派三皮嘢(三萬)利是夠唔夠?佢即刻話:『你都腎嘅!三皮邊夠呀?樓下便利店都要派呀!』」
家棟即時向大塊田獻計說:「日日開工嘅派五十、一百,唔係好熟就二十,我開工都有派嘅。」大塊田便說:「派畀我呀?」但家棟卻笑說:「我未結婚,畀廿蚊你。一係咁,你畀八十我,咁我唔使找錢畀你!」
採訪:朱倬誼 攝影:陳偉權
場地:太古城商場