叫Miluki，芳齡2歲，係隻Cream色嘅長毛臘腸狗。我祖宗三代都係選美出生，血統純正唔在講，所以我同受訓過嘅爹哋媽咪一樣，為咗保持儀態，淨係識瞓同企，好少坐喺度。你知啦！女仔之家，坐得唔得體，好易俾「狗仔隊」影到走光相㗎嘛！嗱！嗱嗱！阿攝影哥哥影到趴晒地，碌到周身樹葉，好似好搏咁，咪以為我唔知你想點！你咁衰，我一於瞓覺，唔俾你影！
記者：陳慧敏 攝影：伍慶泉（部份相片由Ami提供）
踏上模特狗之路
我嘅性格有啲怕羞，但就夠淡定夠斯文，遇到陌生人都好得體唔會亂咁嘈，所以媽咪好鍾意帶我返寵物店同同事Social吓。有次遇着有本雜誌過嚟影最新一季嘅狗時裝，個記者一入舖頭，就俾我清純嘅眼神，鬈曲又柔順嘅金髮同溫文爾雅嘅異國氣質吸引，指明要我做Model，演繹新一季時裝。咁點好意思呢？但係明星嘅氣質，好難冚得住㗎嘛！就咁我就做咗舖頭出品狗時裝嘅代言狗。
大把裙下之臣
上年睇完深田恭子嘅《下妻物語》，媽咪都買咗件四百幾蚊嘅SweetLoveLolita服畀我。𠵱家媽咪都不時帶我參加吓啲業餘CatwalkShow，爹哋又好鍾意同我出街影造型照貼上網，不過佢好衰，成日偷影我啲純潔無瑕嘅睡姿相，搞到𠵱家好多客人都成為我嘅裙下之臣，嚟到舖頭都要同我合照吓。媽咪重幫我做咗好多印住我個靚樣嘅卡片畀我識朋友，但次次都好快派晒，𠵱家惟有用住大佬嗰啲頂住先啦。唉，靚，真係罪過。
臘腸家之私相簿：爛瞓篇
臘腸家私相簿：Fashion篇
媽咪一見鍾情
點解我咁搶手迷人？因為Cream色長毛臘腸狗好少有。喺香港數量更加唔多，即使喺寵物店有得賣，最平都要萬幾二萬銀，係一般顏色臘腸狗嘅4倍。喺我出世嘅時候，媽咪就睇中咗天生金毛嘅我，同時向我外家的主人展開一連串嘅提親攻勢。媽咪為咗我嘅美貌，個個月都嚟探我幾次，又承諾周時帶我返外家玩，終於用誠意感動咗我外家，俾我跟佢返屋企。
你快樂所以我快樂
我今年兩歲喇，屋企裏面我最細，個個都錫，包括3歲大嘅大佬Dachs同家姐Poppy。我最鍾意同家姐玩。佢嘅個性，同佢又紅又令嘅毛色一樣咁熱情，每次同佢去公園仔，俾佢攞到個波波，佢就會發力狂奔，奔到我同媽咪都追佢唔到。不過我就最鍾意見到佢開心個樣，唔知點解，每次見到姐姐發癲猛咁跑嘅時候我就好興奮，好想追住佢，雖然每次我都追佢唔到。總之，見到佢快樂，我就會更加快樂。
保母唔易做
我哋家住灣仔，實在冇乜地方俾我哋去玩。媽咪成日都搵的士接送，帶我哋上山頂公園歎吓日光浴，一玩就係四個鐘。因為我哋臘腸狗嘅手腳太短，腰骨仔又長又脆弱，唔可以跳上床之餘，更加唔可以行樓梯。但我哋家住二樓唐樓，冇得搭𨋢。每次媽咪帶我哋去散步，都會以一雙壯臂夾住我哋三個，一口氣托晒我哋返二樓嘅屋企。有時我哋未玩夠唔聽話扭吓計，行行吓就會跌咁隻，搞到一仆一碌，媽咪執得一隻嚟，第二隻又走佬，都幾搞笑。不過真係要喺度講句，辛苦晒喇！媽咪！
