人人都睇住喺公共廣播檢討之下，香港電台命運如何，香港電台阿頭廣播處處長朱培慶噚晚罕有地接受競爭對手商業電台訪問，佢一開始就同《無底深談》節目主持人李慧玲講笑，話好擔心會俾同事會話佢益晒外人。
烽煙搵高官有絕招
朱培慶講到香港電台風波，過去幾年確實不斷有壓力，乜嘢傳聞都聽過，甚至有傳港台會收檔，但佢都唔係太擔心，其實佢到○八年八月就夠六十歲退休，都有晒心理準備隨時起身走，不過佢對公共廣播嘅信念就必須講清楚，而且要為港台員工出聲，佢認為公營電台有存在價值，港台公司化亦係最正確嘅出路。
講到近年深入人心嘅「烽煙」（phone-in）節目為港台帶嚟唔少政治壓力，原來朱培慶就係第一代「烽煙」節目主持人之一，不過佢好謙咁話，「烽煙」始祖係佢師傅──七十年代港台直播節目《太平山下漫步》主持人歐陽義德，佢當年已開始即場接聽市民電話，同要求政府部門回應。歐陽師傅重教咗佢一項絕招，話說當年有個政府部門一直唔肯回應，歐陽義德於是喺節目入面打開本政府電話簿，將嗰個部門署長嘅辦公室同屋企電話號碼讀出嚟，叫聽眾自己打電話去問，結果嗰位署長嘅電話響個不停，被迫要作出回應。
爆料熱線：29290000、27860099
報料傳真：26239278
報料電郵：[email protected]