曾特首噚日出巡新界，除咗去一定要畀面去嘅鄉議局新春團拜之外，重特登走去近日事故多多嘅九廣鐵路火炭車廠睇吓，喺環運局長廖秀冬同九鐵主席田北辰陪同下參觀咗列車維修設施，又同維修員工傾咗一輪，之後曾特首就陪太太去沙田馬會歎茶。據曾太講，曾特首落車廠係因為見到九鐵員工近日好辛苦，所以去同啲員工打打氣。
講番鄉議局團拜，真係官蓋雲集，除咗曾特首之外，財爺唐英年都畀足面出席，鄉議局主席劉皇發見有咁好機會就乘機向財爺施吓壓，佢致辭時話，𠵱家經濟復甦，財爺成日蓮子蓉咁口，真係滅赤可期，減稅有望，但財爺只係一味笑，都唔知佢係含笑默認定係一笑置之。
爆料熱線：29290000、27860099
報料傳真：26239278
報料電郵：[email protected]