噚日立春，先祝讀者狗年「買升有升，肥過肥仔」。去歲雞年升幅之冠係彩票股華彩（8161），高達111倍，同類看通（1059）大落後，1059要買。看通家陣PE5倍，現價係NAV0.45元的1.4倍，雞年股價係咁意升1.4倍，所有數據，只不過反映緊集團原有電訊業，現價重未加埋新拓展電子彩票業嘅premium。
睇睇同類股，華彩現價係NAV16倍，外國同類股中，Entralot係9.3倍。再睇PE，澳洲Tabcorp往績PE21倍，預期近15倍，Tattersall's預期PE亦係炒緊15倍。看通追近外國同類股，潛在升幅係2.1倍，追到華彩，潛在升幅係10倍。再講，呢期看通邀來猛人坐鎮，拓展彩票業，包括香港賽馬會前董事要員、L.AFBI前助理局長，現任知名會計師行首席合夥人，看通搞彩票業，想做到Bestofthebest。上年走雞華彩，今年要煲看通。
泛海有歐資名牌垂青
泛海（129）上年10月到家陣，喺近兩年超殘位兜咗兩個小圓底物體，等破250日線飛天，又講兩點：第一，泛海今年1月以嚟，時不時見到有某大歐資名牌密密食貨，以往少見。呢期麗國（191）喺上月尾同樣有歐資入貨場面，之後基金PMA牌頭曝光，揸咗麗國6%，博泛海如有雷同。
第二，泛海NAV0.8元，現價（0.315元）折讓60%，折讓之大，喺本港地產股中數一數二。呢期基金各師各法，有特別鍾情資產折讓大嘅二三線，泛海啱部份基金口味。純走勢，泛海破到250日線0.335元，下個目標係0.4元，現價潛在升幅27%。
錢雋