對一個男人來說，二十四至三十三歲，叫做黃金十年。
鄭中基（Ronald）這十年全投注在娛樂圈，由年少輕狂到沉穩內斂，笑匠、無賴到賤男，他對過去作個小總結：「十年生死兩茫茫，不思量，自難忘。」Ronald中文不算好，但對蘇軾《江城子》中的頭幾句很有feel，他說：「講生死太言重，不過呢十年發生嘅，任誰都不易忘。」蘇軾講的是對亡妻的思念，Ronald卻討厭講女人。
回顧篇：年少輕狂唔識嘢
九六年加入樂壇，《左右為難》和《搬屋》兩首歌為鄭中基打開港、台市場，被稱新人王，當時的確風光。Ronald憶述說：「我首國語歌《珍重》，裏面有句歌詞『把珍重寄放在你的心』，『珍重寄』嘅國語諧音就係鄭中基，嗰陣班台灣歌迷唱到呢句特別大聲，我就覺得自己好有power。我曾經呻過自己做到隻狗咁唔知為乜，後來先知，呢行做到死好過坐喺度悶到死，嗰陣年少輕狂唔識嘢，𠵱家愈忙愈興奮。」
「太開心係會好想喊」
出道第五年正值千禧，醉鬧飛機事件對Ronald來說有如911般震撼，災難後的重建工作很艱苦，讓他學懂做事三思及負責任的重要。「條路行得太平坦，冇乜意思，當然大挫折冇人想有，既然發生咗，不如諗吓點樣將佢變成正面力量好過。」Ronald變得沉穩了。
十年演藝生涯，到第十年一曲《無賴》為Ronald的歌手身份重拾光彩，獲得無綫勁歌金曲的金曲金獎，他激動得哭了，後來說起，嘴角卻帶笑意：「以前睇見其他歌手上台領獎，一個二個激動到哭喪咁，我心諗開心唔係應該笑㗎咩？而且得唔得獎心裏有數啦，有冇咁誇張，𠵱家輪到自己，真係冇誇張，心裏真係冇數㗎，我第一次感受到，當一個人太開心，太激動真係會好想喊。」
Ronald近年要一人分飾三角，三個封號都是被標籤的，無論同意與否，也只能任人發揮，連他自己都笑說：「唱完《無賴》之後，我發現乜嘢封號都好，歸根究柢都係市場需要，只有睇開啲。」
「歌詞數嘅我都有份」
主要角色，首選「無賴」，Ronald唱此曲，不少人掩住半邊嘴笑他入型入格，他說：「根本上好多男人都話有共鳴，可能大家覺得自己啲衰嘢唔敢揚，呢條儍佬竟然夠膽死唱，我唔否認歌詞裏面數嘅，我都有份，但我相信大部份男人都至少有一兩項被講中，咁係咪十個男人九個無賴？我嚟緊首新歌叫《美女與野獸》，可能大家會改口叫我野獸。」
Ronald因着○二年頭《行運超人》中的斷蟹扮女人造型成功出位，及後擔正喜劇《龍咁威》大旺添食，奠定「新一代笑匠」的地位，領着優質標誌卻不無壓力，他擔心地說：「引人發笑唔易，有人認同梗係開心，但有隱憂，我唔想被定型，我想拍多啲其他片種，最想演大反派。」
「唔鍾意公開感情事」
樂做反派卻拒當賤男，Ronald出道至今緋聞從未離身，他不忿說：「話我賤男，有乜理據？其實係傳媒將我塑造成花心形象太成功，就算我好地地，只要有人（女友蔡卓妍？舊女友楊千嬅？）皺一皺眉，就寫到我如犯天條咁。愛情裏面有甜酸苦辣，冇話永遠甜到漏。我知每逢男女分手或嗌交，多數認為錯在男人，但係聚散要講緣份，維持感情要睇性格夾唔夾。我唔鍾意公開感情，因為討厭日日俾人問拍拖嘢，兩個人嘅事，人哋支筆點好都唔會寫得清楚，總之我𠵱家過得好好。」
撰文：蔡如玉 攝影：林德雄
化妝：Yen
髮型：[email protected]
場地提供：LABRASSERIE,THEMARCOPOLOGATEWAY
服裝提供：D&G
