話中國傳統社會係父權社會，相信冇乜人反對，老竇係一家之主，一家人靠佢份人工先至有飯食，靠佢經營生意發達至有福享，老竇若怒吼一聲，家人誰敢不從？睇粵語殘片家春秋，莫講話性格軟弱嘅張活游對住老頭子盧敦唔敢出聲，即使樣貌剛直嘅吳楚帆，一樣低頭不敢冒犯。
進入二十一世紀，父權當然冇咁誇張，但仍然係社會主導，城市人嘅家庭關係遠遠冇以前咁密切，子女挑戰老竇權威者不知凡幾，但係在鄉村地方，傳統牢不可破。呢，睇電視新聞好有啟發性，年初五（二月二日）漁護署官員到沙頭角收雞，好低聲下氣，叫鄉民自動交出雞隻，有人係都唔肯，一位阿婆重在記者面前即場表演劏雞，話留番嚟慢慢食都唔肯交畀漁護署，對佢嚟講，沾染禽流感嘅威脅性遠遠比唔上養雞而食嘅價值。另一家人，兒子自願交出雞隻，碰啱一家之主趕回家中，呢位先生大喝一聲：「我至係老竇，個仔話交出啲雞都冇用！」於是大家陷入僵局，中國父權之威力，發揮得淋漓盡致，老竇在此，子女豈敢出聲，官亦無符。
沙頭角元墩山村方圓五公里之內嘅村民肯自願交雞者，只佔養雞戶之5%，共十隻。賓架陳歎曰：「原來我哋香港收雞防範禽流感都咁難，令我懷疑到中國大陸、泰國、越南、印尼、伊拉克、土耳其呢類國家嘅窮鄉僻壤，爆發禽流感之後，收雞殺雞會唔會得個講字呀？佢哋宣布嘅殺雞數字，邊度信得過。」
賓架陳或者係「小人之心」，但諗到上述地方，鄉民更唔捨得自動交雞、殺雞，加上貪污之風甚盛，話唔定送雞髀可以等同賄款，官員豈唔會產生隻眼開，隻眼閉之心理！世衞組織根本無從監察。
「我至係老竇」一句聲震屋瓦。要戰勝禽流感都唔難，要從中國人、亞洲人心中消除「我至係老竇」嘅權威性，好難好難。