久違了追劇嘅感覺，《迷》、《4400》、《大長今》？我嘅評語係「好睇」！老外嘢始終感受硬係隔一重；土炮電視劇係咪差成咁呀？一言以蔽之，呢幾年真係每下愈況；從未好睇過？當然唔係！DVD新返由韋家輝監製嘅《馬場大亨》，大橋勁、粒粒星演得好、人物性格去得盡，大膽講每集均有精句，而且嗒落有味，發人深省。
記者、攝影：朱崇德
無記真係拍過好多經典電視劇，《大時代》、《義不容情》、《射鵰英雄傳》、《神鵰俠侶》、《倚天屠龍記》（指定係「鄭老抽」版呀！）等等，真係數都數唔晒，近呢幾年佢哋都有出過上200套BoxSet，不過普遍都係VCD！不過由上年底12月嘅《尋秦記》開始，就以VCD、DVD版同步推出，今次《馬場大亨》亦同樣有兩個版本選擇。DVD開價$298×2、VCD則$258×2，實在搵唔到任何理由唔買DVD版本！
數碼修復靚畫質
對《馬場大亨》記憶已有點模糊，追溯已是93年作品；雖然已經十多年，但開機畫質一樣做得幾靚吓，據稱是曾作數碼修復的「加靚版」，唔講得上可以靚似HD，不過冇鬆鬆散散已經要拍晒手掌！
故事以黃日華飾演的李大有為中軸，講佢點樣由一個連賭馬都係外行嘅收數佬，一步一步成為馬場大亨。不過大家唔好誤將佢定性為一個「賭仔」故事，相反佢投射出來的意識，係人只要有夢想，發「夢」過程可能會困難重重，有魄力、有毅力嘅人都可以從容面對，成其事者固然係贏家；「夢想」最終落空？退一步看其實已經贏咗過程，只要鍥而不捨就算輸到負資產，最終亦可圓其夢，真係幾熱血吓！
扭橋變化令人深思
故事劇情去得盡、人物性格極端，可以話係韋家輝呢個時期嘅特色，好似尹揚明唔小心喺車房焗死4個女，同大有嘅口頭禪「錢解決到嘅問題，就唔係問題！」，時至今日大家還好像歷歷在目！黃日華欠下巨債，陳秀雯竟然有錢唔借，婚都唔結就走佬，好似好過份，但以另一角度睇，倒不如同佢Keep住先保留實力來得更好；遇到呢類天人交戰戲位，當中變化微妙每每令人三思。論經典場面，當然係劇集尾段黃日華喺車窗見發夢王跑過啦！嗰種感人程度，絕對可列為電視經典！
《大運河》睇後生Look偉仔
《大運河》亦係同《馬場大亨》同步新返電視連續劇；講畫質！由於係87年嘅作品，真係點都會差咁啲。劇情主要講隋末唐初，虬髯客（梁朝偉飾）同李世民（劉青雲飾）的故事。經典之處係返大陸實景拍攝，而且糅合歷史演義、武俠劇之特點同山河壯闊的場景，真係有氣勢。不過更值得推介嘅，係裏面嘅Making，好明顯係當年《K100》式電視製作特輯，不過有偉仔後生年代嘅專訪，真係好鬼死靚仔Feel，再比對番近年《無間道》嘅造型，真係笑到碌地。
電視劇BoxSet之最
最好賣！《神鵰俠侶》、《射鵰英雄傳》
據發行商現代音像表示，現時最好賣兼長賣長有嘅「無記」電視劇，都係以2000年推出嘅《神鵰俠侶》同《射鵰英雄傳》居榜首，佢哋話都唔知重新加印過幾多十次嘞，不過都係每隔幾個月又要加印。
講真！金庸嘅武俠故事基本已是銷路保證，加上《神》裏面有全盛時期嘅劉德華同陳玉蓮、《射》則有公認為最有原著神髓嘅黃日華同翁美玲做拍檔，當然係不得了啦！據知《神鵰俠侶》會喺下周10號，首度推出DVD版，話明係食住情人節同大家見面，價錢則未定，至於《射鵰英雄傳》就暫時未有DVD化嘅考慮，可能戲迷們要等一等。
最追「星」：周星馳系列
另一長賣長有嘅電視劇，只可用「人」、唔可以用戲嚟做區間，講緊嘅係周星馳所拍嘅電視劇，基本上只要有佢演！就一定會好賣，當中代表作有《他來自江湖》、《黑白殭屍》同《蓋世豪俠》（$298×2）等，不過由於屬早期推出劇目，所以都只係得VCD版本。
最有情意「結」：《輪流轉》
《輪流轉》亦係好多人搵嘅「無記」BoxSet！何解？皆因當年電視播時，尾段係腰斬冇播到㗎！好多人為搵番《輪》嘅最後結局，所以咪要搵嚟買囉！不過都係老規矩，只有VCD版，DVD暫時免問。
最好賣「文」戲：《大時代》
唔知大家有冇留意到，以上所講好賣之戲，都係以武俠片居多，文戲？好明顯真係差幾皮，不過唯一例外嘅係《大時代》，亦係韋家輝巔峯時期的作品，丁蟹嘅人善人欺天不欺、人惡人怕天不怕嘅自我中心，方展博嘅極端再加慳妹嘅可愛，人物性格非常突出；而且大橋亦去到非常盡吓，一開場就見4隻小蟹俾丁蟹掟落街，亦係香港電視史上經典場面。
新碟速報
3區港版
子有祥情林子祥演唱會LIVEKARAOKE/$125
（可買度：★★★☆☆）
外出（雙碟特別版）/$99
（可買度：★★★☆☆）
孤雛淚（雙碟特別版）/$99
（可買度：★★★☆☆）
無敵女金剛BoxSet/$298
（可買度：★★★★☆）
美版1區
恐懼鬥室2/$178
（可買度：★★★★☆）
毀滅戰士/$180
（可買度：★★★★☆）
超級無敵獎門狗：
世紀大騙兔/$180
（可買度：★★★★☆）