近兩星期行山搵啖食都由小記主理，先後去過長洲及坪洲，論悠閒首選坪洲，鄉土氣息就有長洲做代表，今時今日南丫島可以話兩者兼備，每逢星期六、日必定人頭湧湧，難得係南丫島風光依然如畫，再加上新近落成的風力發電機有望成為嶄新地標，趁新一年嚟轉個大運，跟手食埋馳名得獎菜，趁早完成「人有我有、人試我試」嘅小市民願望。
記者：羅灝汶
攝影：陳盛臣
Model：Phyllis&Jason
名人撐場海鮮店
遠離市區到達南丫島，當然要試試中外馳名的海鮮，天虹海鮮酒家在南丫島非常出名，屬遊客必到「景點」之一，其中一個賣點是天虹的海鮮夠新鮮，陳師傅話：「我哋有私人魚排，而且我堅持所有食落人客肚嘅海鮮都要係新鮮貨先得。」陳師傅近年屢獲美食大獎，創製出不少得獎特色菜，一眾藝人如周潤發、容祖兒、梁朝偉都係捧場客。
百花齊放詠香江$200
榮獲2005年美食之最大賞「齋」組比賽的「至高榮譽金獎」，所有素菜堅持用有機蔬菜，以全素食為賣點，連伴碟的薄荷葉都是酒家自家栽種，其中羊肚菌由法國新鮮運到，要千多元一斤，非常矜貴。
南丫島蝦膏炒飯$80
話明南丫島蝦膏炒飯，當然用南丫島土產蝦膏，每年七、八月都是蝦膏當造期，師傅會於此時入貨，一入就是幾百斤，所以蝦膏炒起來特別香，睇見都流口水。
芝士焗元貝$100
陳師傅15歲入行，由西廚學起，其中得意成名作就有呢味芝士焗元貝，每隻元貝都是即叫即劏，再加入薯茸、自製芝士汁做汁料，口感一流之外，仍可以保持元貝鮮味，原來秘訣是控制焗爐火候，用啱300℃焗5分鐘即可。
食客有say
Dianna：我得閒都會帶齊佢哋幾個嚟食嘢，最鍾意梗係碟牛油焗海鮮啦！
天虹海鮮酒家（29828100）
地址：南丫島索罟灣第一街16號
營業時間：10:00am-11:00pm
座位：約200個
觀景涼亭睇超靚view
船未泊岸，距離榕樹灣碼頭附近時，已經可以見到巨型風車在山上轉動；這座全港第一台的風力發電機，坐落大嶺村山丘，離開碼頭後，只要沿小路往洪聖爺灣方向走，經過一大段村屋（途經「建興亞婆」豆腐花），便會找到電廠車路，路途較斜，當到達第二條大路時才往左轉向上走。怕曬的朋友大可放心，因為路上有樹蔭，大概步行20分鐘，風車就會出現眼前。風車對面小山丘有觀景涼亭，可以靜心欣賞風車及飽覽對岸的香港仔及鴨脷洲，想新一年轉轉運兼開開眼界，就要馬上起程嚟睇睇喇。
天然偷閒加油站
位於洪聖爺灣的香草原由兩位年輕都市人建立，大約3年前Gary辭去廚房設計師的工作，實行過自給自足的農民生活。園中香草花茶全部由Gary等人一手一腳栽種，保證不含農藥全天然。草原有過百種花卉、蔬菜，花茶已經有50款，每種都有不同療效，堪稱都市人的偷閒加油站。
金盞花茶(前)、洛神茶(後)各$15/杯
紅色的是洛神茶，有改善便秘、降血壓等功效；黃色的是金盞花，據稱有舒緩皮膚炎、胃病等療效。
香草原（94142866）
地址：南丫島榕樹灣洪聖爺灣泳灘側
營業時間：11:00am-6:00pm
座位：約35個
睇罕有白龍皇
南丫島的天后廟相傳有150多年歷史，當中最值得一睹的當然是廟內的「白龍皇」，白龍皇是條長2.74米的大魚，話說2001年首次出現於東南丫海峽海面，被漁民撈獲時已奄奄一息，漁民將死後的白龍皇製成標本，全亞洲製成標本的就只有五條，其中一條有幸在南丫島的天后廟，據講見過白龍皇更會帶來好運呢！
卧虎藏龍甜品店
除了天虹海鮮出名外，鄰近的南丫鮮果甜品店絕對稱得上卧虎藏龍，店主李先生及太太自創的甜品曾榮獲美食之最大賞「甜品」組比賽金獎，平平無奇的店舖第一次參賽就得到如此佳績，非常厲害。推介甜品有梳乎厘芝士餅及棉花燉蛋，稱得上是鎮店之寶，必定令你食過翻尋味。
梳乎厘芝士餅$20
食前需要將叉子直立，一下穿透整個芝士餅！中層採用低卡芝士，梳乎厘加入了玫瑰花香，絕對好食！
南丫鮮果甜品店（29828301）
地址：南丫島索罟灣第一街21號地下
營業時間：12:00nn-10:00pm
座位：約30個
