最愛是誰

林夕的作品水平參差，並非每首詞都得心應手，他解釋：「遇到好歌，自然好多嘢嚟，但係有啲歌嘅旋律，發揮起來有局限。又有時同個歌手唔熟，無從入手。」但他寫給楊千嬅的詞，水準特別穩定，感情份外真摯，例如《再見二丁目》，「首歌旋律好，自然發揮得好。你話偏心又得，唔係又得，我同千嬅熟嘛，自然就手啲。」

Eason勢成歌神

又例如Eason，「我同Eason喺三間唱片公司都合作過，重幫Eason監製過幾首歌。我記得最初合作嘅時候，未到佢唱，佢就喺錄音室出面係咁唱歌，又扮Alan（譚詠麟），又扮學友，佢唱功真係冇得頂。我以後幫佢寫詞，就會想像佢把聲，咁就自然會有好嘢出。Eason把聲自自然然會畀到好多嘢我，佢將會係一個歌神。」
但林夕的偶像另有其人，就是能唱能填的劉德華，「劉華係我偶像，《常言道》寫出一個道理，想贏，唔係要打敗對方，係一種睇化嘅心境。」說起唱作歌手，他也盛讚李克勤的文字功力，「佢有條件成為一個好詞人。」至於梁詠琪，林夕對她的印象比較模糊，只能慷慨的補充了一句：「《花火》有好幾句寫得唔錯，有感動人嘅地方。」

疼愛千嬅王菲

產量三千，問林夕最愛是誰，他選了五首：《約定》、《暗湧》、《假如讓我說下去》、《下一站天國》和《相愛很難》。「《約定》歌詞內容有啲真實嘅嘢，好有感情。歌詞提及嘅『便當』係真嘅，有豬手，好好食；係我同一個朋友喺台灣街邊，一人一個，街燈下面食。」那位朋友是誰，林夕笑而不答。
林夕說，最疼的歌手是千嬅和王菲，還有……「唔講啦，你估喇！」然後臉上浮出一絲曖昧的笑意，但始終沒有吐出「黃耀明」三個字。

後記：怕肥

讓這口煙跳升，我身軀下沉。如果政府即時頒布法例，禁止藝人接受訪問時吸煙，小記會全力支持。不足一小時的訪問，小記吸了六、七支二手煙，整個訪問都在氤氳的尼古丁毒霧裏進行。難怪，林夕這麼苗條。
瘦到無倫的林夕，偏偏怕肥。他對鏡頭的觸覺，不遜於幕前的演員。攝影記者稍為低角度拍照，夕爺就會叫停，「咁樣會影得我好肥。」
撰文：蔡元貴
攝影：陳慧安
協力：蔡如玉