詩姐嘅愛國熱誠毋庸置疑，睇佢肯為新上場嘅煲呔留任，搞埋壇政改大鑊嘢先正正式式退休，加上任內又經常為人大釋法護航，就知佢永遠「忠」字行頭，願意為國貢獻。
既然為國犧牲咁多，中央又點會唔畀返啲地位同名譽佢。據知下個月，北京召開人大政協兩會期間，就會向詩姐發送喜訊，宣布佢出任人大系統下、某某委員會內，一個屬於副部級待遇嘅職級。呢個委員會，有可能係基本法委員會，亦有可能係法律委員會，最大機會係一啲非全職職位，例如名譽顧問咁啦，象徵意義大於實際作用。
早前都傳過詩姐可能會獲增選為政協常委，但據知每屆政協只可以增選一次委員，上年增咗腳痛落台嘅董建華做全國政協副主席，今年一定冇可能，所以要循其他委員會着手。其實做咩位都好，只要係為國效力，愛國心熱熾熾嘅詩姐一定唔會介意。
傳真︰2623-9278
電郵︰[email protected]