公關大姐於大年初四開工兼開年，召左丁山到鏞記與佢一班靚女夥計食開年飯。未夠下午一點，上到鏞記，只見門口塞滿人，一啲來港消費嘅表嬸買咗一袋袋嘅鏞記燒鵝、臘腸，大概等旅遊巴？踎喺門口，搞到左丁山行路之字形，唔小心踩親呢批內地貴賓嘅話，可能吟詩都吟唔甩。
好辛苦入到地廳，左閃右避之下，行到樓梯，唉吔，樓梯兩旁竟然坐滿排隊入座之食客，逼到上三樓，心諗全港酒樓食肆之中，呢間燒鵝名店都算厲害。好彩大姐大功力深厚，一早訂好位，成班靚女笑得好甜，坐得好安樂，等候上菜。大姐大話做公關第一件事就係要笑面迎人，話之你俾人客嘈到暈，一定唔准黑口黑面。經大姐大一提，醒起酒店M亦講過，做酒店前線人員，第一誡條就係永遠面露笑容，說話有禮，永不托手踭。話說佢間大寶號在凌晨兩點，忽然有人客打電話到roomsevice，話要食麥樂雞，酒店餐牌本來無此供應，大可講No，但五星酒店話明顧客至上，以客為尊噃，自己廚房冇麥樂雞，都要代客籌謀㗎。負責餐飲嘅同事向夜班經理報告，問點樣處理，夜班經理即刻叫夥計坐的士去銅鑼灣搵重未關門嘅麥當勞，買兩份麥樂雞返嚟，一份立即送上房，一份作後備，預防人客添食。至於咁樣做，要收人客幾多錢，酒店M笑笑口話：「收一百蚊叫做合理，計埋來回的士費，冇錢賺！最緊要人客滿意。」
管理L聽酒店M講呢個小插曲之後，問酒店M：「你哋嘅營運手冊有冇寫到明呢類微笑、服務嘅要求，作為員工守則呀？否則員工有理由抗辯，話管理層指示唔清晰，對佢哋唔公平噃。」酒店M聽咗，幾乎吹鬚睩眼咁回應：「使唔使樣樣白紙黑字寫到明呀？呢啲係酒店行業嘅commonsense啫，寫守則就太死板啦！」管理L反駁：「你以為啦，如果唔係，廁所內使乜貼上標語：用廁後請沖廁噃！」