吳浩康前晚去咗大會堂擔任由懲教署舉辦嘅「更生星光樂飛翔音樂會」表演嘉賓，獻唱在囚人士作曲填詞嘅歌曲，許志安、夏韶聲、江欣慈同李樂詩等都有演出。
永遠唔會放棄
吳浩康以過來人身份同在場上嘅更生人士分享佢當年藏毒被捕嘅情況，佢話：「嗰晚喺油麻地警署門口，有超過一百二十個記者，等一個黑布蒙頭嘅歌手行出嚟。今日我有勇氣企出嚟同大家講，因有位uncle陳慎芝話，做人冇乜特別，你可以見我成功，可以見我失敗，但永遠唔會見到我放棄。」
雖然呢番說話大把人講過，但出自吳浩康把口，班更生人士聽落就特別啱聽，紛紛拍手和應。吳浩康同馮仁昭講番，話佢唔係因為怕尷尬而缺席綵排，佢當日下午一點綵排，時間係懲教署嗰邊安排，吳浩康話：「我唔知可以出到幾多力，但希望畀到鼓勵啲在囚人士，都有諗過寫首歌畀佢哋。懲教署話我可以同班在囚人士研究音樂或者一齊表演，我亦唔介意喺任何地方表演。」
短片有影冇聲
而另一位曾藏毒嘅蘇永康話有事唔嚟得，現場由一位懲教人員代佢演出，大會惟有播放佢之前去懲教所探訪嘅短片，但有影冇聲，都唔知佢講乜。