當年（一九八九年）我簽王菲，係因為佢唱得好，把聲幾吸引，加上小弟自覺九七唔會離開香港，所以簽個大陸妹睇吓有冇奇迹出現。當時我嘅下屬、同埋公司（新藝寶）嘅宣傳部經理紅牛（花名）衝入房話：「你簽咗個大陸妹呀？咁以後派歌上台你自己派嘞，我唔會派。」
多年後我喺一個頒獎禮撞番紅牛，佢話：「你恭喜我啦，我個歌星攞咗咁多獎。」原來佢嗰陣簽咗許美靜，許美靜咪又係抄王菲，跟王菲口水尾！
愛音樂拒嬉戲
嗰陣雖然我一年都見唔到阿菲三次，但我哋溝通冇問題。阿菲係一個典型嘅北京人，鍾意啲嘢有深度，人生觀比較嚴肅，佢覺得音樂唔係嬉戲，但香港嘅演藝界比較輕鬆，所以阿菲一直顯得格格不入，形成佢冷傲嘅形象，其實呢啲係北京同香港嘅文化衝突。
有一件事好神奇，簽咗阿菲之後，後來我調咗去（寶麗金）遠東區，我一走成個環境唔同晒，Leslie（當年王菲經理人陳健添）將阿菲嘅經理人合約賣咗畀滾石，收咗大概二百萬轉會費，呢個係一個最無謂嘅交易，公司（新藝寶）要雪藏阿菲，於是阿菲（九一年）去咗美國讀書，佢話：「我唔返嚟，我唔鍾意香港，都唔知做乜。」
後來阿菲做咗個訪問大罵香港，內容大概話香港嘅唱片公司同經理人公司，當藝人係搖錢樹，侮辱咗藝人，訪問出街後，同阿菲簽合約嘅一個癲佬好嬲咁去咗美國搵佢，喺阿菲面撕咗張合約，但呢個人（貼士：台灣男歌手）係邊個我就唔講啦。王菲就係咁樣回復自由身，佢返咗新藝寶，一首《容易受傷的女人》（收錄在九二年王菲第四張專輯《ComingHome》內）紅到癲，所以話，呢個世界真係有命呢樣嘢。
九五年王菲冇靈感，出唔到碟，我提議所有寶麗金歌手唱鄧麗君嘅歌，其中一隻新歌由王菲同鄧麗君合唱，係人都知鄧麗君係阿菲偶像，阿菲梗係仆到嚟，重提議「不如成隻碟畀我唱晒啦」，但係聯絡唔到鄧麗君，王菲話：「我要出碟嘞喎，唔可以無了期咁等落去。」我話等多兩個月都搵唔到鄧麗君，你可以唱。後來阿菲開始錄碟（《菲靡靡之音》收錄十三首鄧麗君經典歌曲），隻碟錄咗一個禮拜，鄧麗君就去咗。
追求幸福家庭
我覺得好多大陸女人都追求幸福家庭，阿菲當然唔例外，佢基本上好專一，每期只會有一個男朋友，佢係咪鍾意一個人就會供書教學我唔敢講，但我絕對唔懷疑佢係咁嘅人，搵到鍾意嘅人就會用盡自己所有嘅嘢去留住對方。
口述：陳小寶
筆錄：張止寒
此欄逢星期六刊出
陳少寶（小寶）：曾是商台名DJ，先後擔任新藝寶、寶麗金唱片公司高層，一手捧紅王菲、Beyond，並曾和張國榮、許冠傑等巨星合作，九九年加入環球唱片任總裁，○三年離開，現為陳苑淇經理人。
