踏入狗年，當然係狗仔大過天，即使今天人日都要以狗為先，實行叫埋Boy'z同梁敏儀（Winnie）跟佢哋嘅愛犬去狗cafe開party；另外亦同鄧穎芝隻「蝦米」玩吓尋寶遊戲，最後當然唔少得要同大家拜年，講番兩句賀年說話啦！
記者：曾靜茵、劉昱蘭
攝影︰譚盈傑、林栢鈞
鳴謝：狗仔隊（28815030）
三狗小激鬥
第一回合：鬥頂桔
要三隻狗狗頭頂着桔，時間愈耐嘅就算贏。
第二回合：鬥識食
面前放上賀年食物同狗食物，睇吓邊隻識得揀番常食嘅dogfood。
新年大計齊減肥
Boy'z兩位成員都係愛犬之人，張致恆（Steven）就帶咗三歲嘅史納莎Momoko同大家拜年。唔好睇阿Mo細細粒，其實係肥妹仔一名，肚腩大到逼爆衫鈕。「阿Mo肥到連醫生都話要佢減，𠵱家除咗要食減肥狗糧外，重會同我一齊跑步，每星期跑2至3次㗎！」Steven重幫阿Mo剪咗條新眉，睇佢兩條眉好似眼睫毛咁向上翹，都不知幾靚女呀！
而麥子豪（Dennis）雖則鍾意狗，但就無試過飼養，惟有借Winnie隻「番梘」頂檔，做住佢半日主人先！
掛福袋𢭃利是
Winnie本身養咗3隻曲架，除咗今日亮相嘅6歲阿曲同4歲番梘外，重有隻Copy。佢哋全屬大型犬，平時好難買衫，幸好今年行年宵時見到有兩件童裝背心仔，着咗上身都幾fit喎！除咗新衫，Winnie每年都會畀利是佢哋，重會幫佢哋掛個福袋去親友屋企𢭃利是。因為又乖又可愛，淨係阿曲每年都𢭃到四、五百蚊㗎！
百厭星托世
個個都話史納莎好乖又聰明，鄧穎芝（Vangie）就話愛犬蝦米係反面例證︰「邊有史納莎咁曳，咬爛牆紙後重會喺石屎牆度咬開個窿？真係唔知好嬲定好笑。」０１２唔通蝦米唔只遺傳唔到聰明基因，重係百厭星托世？不過一玩𢭃利是遊戲時，佢又醒目過人喎。
智能測驗
認狗糧
三封利是裏已放入相同嘅香珠，但各會加入狗糧、朱古力或揮春，以測試蝦米搵唔搵到封狗糧利是。
必殺技
專咬硬嘢
據聞蝦米好識食龍眼，今次就放有多款賀年糖果，check吓佢最鍾意食邊樣。
小生怕怕
見炮仗即謝
蝦米好怕炮仗，原來佢以前曾經俾炮仗嚇親，重嚇到狂跑狂吠，震咗成個鐘先平復，所以𠵱家好有陰影。
點過肥年？
Rain
愛犬：腿腿（松鼠狗）
「我同一班養狗嘅朋友開咗個party，最搞笑係腿腿想引人注意但又驚人喎，所以成日不停狂吠。」
利嘉兒
愛犬：豆豆（西高地白爹利）
「今年我會帶佢去親戚朋友度拜年，佢孭住個背囊仔都𢭃到四五百蚊㗎！」
Jan@Krusty
愛犬：阿B（斑點狗）
「今年特別同阿B裝身扮靚，重帶埋煲呔去拜年，都有三百幾蚊收穫。」
吳日言
愛犬：Win（史納莎）
「可能啲親友比較孤寒，即使Win做晒請請動作都無利是。」
譚小環
愛犬︰GiGi（貴婦狗）
「因為GiGi識得企起身向人恭喜恭喜，所以都𢭃咗五百幾蚊。」
小儀
愛犬︰deedee（芝娃娃）
「年初二我同deedee一齊去外婆屋企拜年，我就教小朋友摸吓佢、同佢玩，難得咁熱鬧。」
