【本報訊】政府建議○九年全面禁煙，麻雀館等場所也不例外。麻雀館過去予人感覺是龍蛇混雜、品流複雜，其實全港麻雀館的數目已由全盛時的一百多間，減至現在只有六十間，為與時並進，這個行業決定要大變身，實行現代化、年輕化。 記者：林社炳
麻雀館經理何國樑說：「三十幾年前，嚟麻雀館打牌，以蠱惑仔、撈家同舞小姐居多。近十幾年，呢類客多咗其他消遣同賭波，𠵱家要靠得閒嚟麻雀館玩幾手嘅推銷員、小商人同家庭主婦。有時重會有自由行旅客，甚至有外國遊客。」
改善服務質素
近年麻雀館招攬年輕人入行，甚至打破傳統聘請女性擔任全職或兼職「戥腳」，陪客人打麻雀。經營麻雀館二十多年的陳鍾強說，為洗脫麻雀館一直以來的負面形象，決定公開招聘年輕人入職，改善服務質素，「以前所有麻雀館只會請自己友打工，點會三唔識七搵個陌生人入嚟做嘢吖，更加唔會請女人嚟打工。」
招聘的職位包括全職枱面、樓面、知客和雜工。全職枱面負責招呼客人及抽水，有時要兼職戥腳。
陳鍾強表示，麻雀館盡量安排互不相識的客人同枱耍樂，但有時「一缺三」便會由全職穿制服職員，加上穿便服的兼職戥腳陪客打牌。他強調，做戥腳的一定會依據牌例，絕對不會「打龍通」。
主任權充判官
任職麻雀館主任的阿敏說：「我以前喺桑拿浴室打工，公餘鍾意打麻雀。𠵱家轉行喺麻雀館搵食，主要招呼客人，睇佢哋想打幾大嘅牌，安排戥腳埋位同佢哋耍樂。自己已經好少落場。」阿敏精通麻雀館牌例，遇有客人不明遊戲規則，會禮貌地從旁說個明白；遇有客人爭拗，她會依例權充判官，裁定誰是誰非。
年逾四十的泉哥五年前起在麻雀館做兼職「圍工」，每日兼職四個半小時，賺取底薪四百元。所謂圍工是向公司代支本金打麻雀，贏錢在歸還本金後，餘款與公司按比例對分；若輸去本金，同樣要與公司拆帳，各輸一半。泉哥說：「十五歲就鍾意同屋企人打麻雀，一九八○年第一次入麻雀館，唔係咁清楚啲牌例，要在場嘅職員教路。」
泉哥入行前失業了好一段日子，他慨歎，雖然自己愛打麻雀，但做圍工有時要看運氣，長期倒運輸錢，會被公司列為「黑牌」，可能再次失業。他透露，有不少兼職戥腳為了生活，經常「走場」兩三間麻雀館。
退休阿伯兼職
六十五歲、退休多年的郭伯說：「自己以前做飲食業，中間落場就去麻雀館打牌。退休後唔係坐公園，就係匿埋喺屋企瞓覺。」為賺取一點生活費，他兼職麻雀館「福工」，每日戥腳六小時，輸贏全歸公司，他則可賺取時薪三十至五十元。
陳鍾強不諱言，麻雀館是一門生意，當然不希望公司蝕大本。但有時就算是牌技高超的戥腳，也會因運氣不如人而連輸四手牌，這時候公司會換上新的戥腳，「打開門口做生意，當然係顧客至上。客人無論贏輸，隨時都可以移燈、換櫈、食煙、洗手、趟櫃桶。客人就算打一鋪，贏咗錢要走，絕對無問題。」
