租客入市買樓，考慮因素會多啲，因為要諗埋住緊單位嘅租約問題，不過，元朗金龍樓呢個買家，就認真好彩，買到心頭好之餘，提前終止現居所租約，又唔使賠錢。
呢個買家，住緊元朗三百零呎單位，月租四千，重有三個月至約滿，一個月前開始搵樓，最後睇啱同區金龍樓一座低層E，五百八十六呎，計劃改善環境，同業主攞長成交期，但遭拒絕，諗住最壞打算係買完單位，賠錢提早終止租約，搬入新居。
美聯分行經理鄧涇渭話，因為個客住緊嘅單位，係經佢哋公司促成，而美聯又同佢嘅包租婆好熟，結果可以唔使賠錢，提前解除租約。
上手業主係投資者，舊年七月，用七十三萬入貨，放盤叫一百萬，因為唔想畀長成交期，價錢肯將就啲，終於以九十三萬成交，每呎唔使千六。至於新買家，月供四千四，負擔唔係增加好多。
金龍樓有兩座，單位共二百四十個，平均三個月至得一宗買賣，上個月冇成交紀錄。𠵱家只得四個放盤，叫價每呎千四至千六。
電郵地址：[email protected]