甫踏入狗年，除卻狗仔之外，狗年出世的朋友一樣成為今年話題，皆因佢哋犯太歲，各大堪輿學家都忙着教大家如何化解行運。今日就請來3位名副其實的狗仔狗女，但並不是要講甚麼來年運程，而是簡簡單單玩吓遊戲食個包，老實講，大家後生仔女，又有甚麼忌諱、怕甚麼犯太歲，最緊要新一年過得輕鬆開心，所以Mandy、陳苑淇同埋商台DJ阿喱一齊熱鬥「狗」項全能，睇吓邊個最「狗」。
記者：黃若茵 攝影：楊錦文、林栢鈞
創意題
趁狗年，一於搵來3隻24歲的狗仔狗女做「狗項」大測試。第一輪測試考吓創意、手腳靈感度，首先睇吓佢哋寫揮春如何祝賀自己先。
第一項：狗人狗揮春
遊戲玩法：運用一句有「狗」字、「犬」字或跟狗有關的四字祝福語，祝賀今年的自己，並以毛筆寫於揮春上，字體都會計分㗎（10分滿分）。
DJ阿喱話97年係佢𢭃最多利是嘅一年，因當時眾人經濟環境都不俗，希望可回復當時快樂的時光。
字體評分：5分
筆畫幼字體麻麻，且旁邊沒有任何裝飾，要扣分喇。
苑淇祝願自己當一個可長長久久歌手，於樂壇做出更好的成績。
字體評分：7分
祝賀語比較行貨，但勝在利用狗仔圖畫代替「久」字，以可愛狗仔樣彌補字體不足。
Mandy話希望今年自己變得更成熟，唔再好似小朋友同埋狗仔般嘈喧巴閉。但卻寫到皺起眉頭，唔通要安靜下來當真咁難？
字體評分：8分
一筆一勾都很清楚，字形比例亦恰當，旁邊重畫有裝飾的炮仗及「狗狗狗狗千足純金」，心思字體統統贏晒。
第二項：鬥快食狗
遊戲玩法：鬥快將一隻9吋長的熱狗食落肚，睇吓邊個最大嘴巴。
除了口夠大之外，更因為用了分屍策略，先吃香腸，再吃麵包，佢話咁樣會容易吞喎。
第三項：㓟皮鬥長久
遊戲玩法：㓟出最長久而又唔斷嘅蘋果皮為勝出！
第四項：假如我是狗
遊戲玩法：幻想自己變成狗後的樣子，並畫出來，解釋得最貼切及合理者勝出。
肥狗Mandy
Mandy變成狗之後完全保留了自己為食的性格，且畫上藍色毛毛一睇就知係佢啦。
解畫：「一頭藍毛髮已是我特徵，而如果我係一隻狗的話，希望會係一隻食乜都唔會病嘅狗，咁我就可以毫不客氣咁狂食，所以會有幾截肚腩！」
富貴狗苑淇
苑淇的畫工最好，懂得利用手指捽開粉彩的顏色，不過畫出來的狗仔似乎表現唔到佢嘅性格喎！
解畫：「我要做一隻好富貴嘅狗，所以金身嘅毛都係金、銀色，再戴一條Burberry嘅頸巾，夠型仔。」
口罩狗阿喱
阿喱以十分簡單的線條及構圖完成了變成狗嘅自己，望望吓，好像似人多過似狗。
解畫：「呢排流感高峯所以要戴個口罩，同時可以吠少啲，唔使咁嘈。而且我會好衞生，好高竇㗎，唔會隨便舔人。」
問答題
畫過畫，寫過書法，係時候做考下常識，動下腦筋喇。
第五項：生肖起源
問題：12生肖中，為甚麼狗會排到尾二咁後？
Mandy：因為雞犬不寧，狗讓畀雞先，所以排到雞後面。
答錯，不過能夠利用已有的成語作合理的解釋，有Point！
苑淇：因為狗鍾意玩，唔夠專心，所以被人掟到咁尾。
答錯，但可見苑淇真係好熟悉狗的性格。
阿喱：排第一的老鼠咁狡猾，狗仔卻十分忠實，不過又比豬可愛，所以就排到去尾二喇！
答錯，能從各種生肖的性格去分析，夠細心。
答案：民間流傳，指當「天犬」協助兔仔剪短尾巴跑贏巨龍後，反被兔仔指摘害它失去尾巴（果然係狡兔），天犬憤怒之下便咬着兔仔，因此被罰排到尾二。
平手！
第六項：狗的親戚
問題：狗屬哪一科的動物？即哪一種動物的近親？
正確答案：狼
三個都識答哺乳類，但都答錯係貓、豹近親，諗多兩諗先識答狼。
平手！
第七項：九唔搭八
問題：過去一年遇到最九唔搭八的事是甚麼？
苑淇：於端午節時收到一位歌迷送花及送上陳慧琳的VCD。
九唔搭八度：9分
阿喱：公司要我同性格跟我完全九唔搭八嘅詹志民合作做節目，點知原來九唔搭八先至有火花。（咁自我宣傳都得？）
九唔搭八度：7分
Mandy：到銀行排隊攞現金，想要嚟封利是畀同事，點知排咗成個鐘先發現原來冇帶公司印。
九唔搭八度：5分，咁樣係大懵，唔係九唔搭八喎！
苑淇勝！
第八項：乜事最狗？
問題：見過別人做最狗的事是甚麼？
阿喱：見過有人喺Newsgroup度鬧某隻CD唔好聽，但轉個頭就問人有冇得BT。
好狗度：10分！不單止狗，重好Cheap呀！
苑淇：睇住個男仔喺自己女友面前錫第二個女仔。
好狗度：10分！不單止狗，重好賤格呀！
Mandy：喺火車見到男仔非禮個女仔，我即刻走埋去鬧佢。
好狗度：10分，直情侮辱咗狗，話時話咁係狗定鹹濕呢？
平手！
第九項：狗種競猜
問題：根據6款不同品種的狗相片，說出該狗種的名字，答中最多為勝出。
苑淇六中五
連最難估的梳長毛西施佢都答中。6個品種只答錯了臘腸狗，共得5分。
Mandy信錯人
於助手的提水下，Mandy答中咗4條，本來西施狗Mandy係答對嘅，但助手又話嗰隻係地拖狗，Mandy誤信助手而錯多咗一題，唔抵！
改名專家
阿喱不斷幫狗仔改名，如西施改成「長毛象燈罩犬」、史納沙變成「鬍鬚狗」、芝娃娃則改成「大耳狗」。搞笑滿分，但都係答錯，只得3分。
