桃花依舊，人面全非，真係令人好感慨。上年立法會春茗，老董都重喜孜孜咁同議員話，唔會對住議員耍太極，點知轉個頭，佢就腳痛落台，由煲呔頂上；詩姐上年又功成身退，由皇仁之龍頂上，加埋鬍鬚曾接手做大內總管，事隔一年，立法會春茗旋即由曾家班獨領風騷，政治壽命呢樣嘢真係話唔埋。
不過，八方眼見噚日個春茗，出席嘅司局級官員同行會成員都唔係好多，行會成員得兩丁友，就係范鴻齡同張炳良，可能係新丁關係，一到場就俾好多議員捉住密密斟，互相交流吓都係要嘅。
望高官議員以和為貴
議員方面就更人丁單薄，大概得廿零個，一半都冇，尤其係自由黨，除咗劉健儀外通通失蹤，重唔畀面過泛民，唔知啲工商佬係外遊未返？定係畀個下馬威煲呔歎吓呢？
煲呔首次以特首身份出席嘅立會春茗，出乎意料咁低調，噚日更喺主席范太邀請下，先至喺鏡頭前同市民拜年，可能費事喧賓奪主啩。
主人家范太一向識做，噚日特登向出席官員送上一塊玉佩，又贈佢哋「誠、忠、和」三個字，希望新一年，高官同議員間能夠以和為貴，以誠意處理問題，化解矛盾，最重要係好似狗仔咁盡忠職守。
本身屬猴，又獲贈馬騮玉配嘅煲呔都話，希望新一年同立法會議員同傳媒合作愉快，認為只要大家本住為市民服務為目標，行政立法會合作良好。
呢一年對煲呔嚟講，真係唔易捱㗎。一方面要保住自己個勢唔好再跌，穩住民望等連任時有足夠支持；同時又要面對各方挑戰，例如陳太出其不意咁出招，左派隔岸觀火，同埋泛民主派嘅處處進攻，真係少啲耐力都過唔到關。
有政界中人重大膽預言，煲呔衰咗政改一鑊，如果再搞唔掂港台，真係有機會同老董一樣收場，而被傳有財團支持、成為煲呔頭號敵人嘅陳太，反而隨時有機會跑出。呢位高人叫煲呔醒定啲，咪以為搞掂民主派，特首寶座就十拿九穩，叫佢做嘢唔好咁短視喎。
傳真︰2623-9278
電郵︰[email protected]
