睇牌面，隔晚杜指跌101點，日經跌50點（本港時間下晝2時收市），恒指點都唔會跌得咁勁，埋單散261點。
踏入狗年，恒指連跌3日，唔見323點。而喺春節期內，日經仍有進帳198點，美股則跌55點（未計昨晚）。港股暫時跑輸，估計好快定得住，再升過。
中石油C輪9467：外圍油價下跌，中石油（857）跌0.20元，收7.45元，石油股C輪成為重災區。中石油C輪9294與9251分別大散65%與60%，收15.9仙與8仙，成為是日第2及第3大死火輪。9294昨日最後交易，冇得再炒。9251下周二最後買賣，溢價1.5%，槓桿率93.1倍，等發行商自己買賣算數。
如認為中石油會反彈，博C輪，9467較可取，5月上旬到期，輪價1.12元，溢價0.9%，槓桿率6.7倍（有效5.4倍），引伸波幅35.4%。不過正股似乎未調整得夠，買9467宜先等吓先。
中石化C輪9389：中石化（386）收4.55元，跌4.7%。末日C輪9424與9426雙雙散34%，兩隻輪本月下旬夠鐘，溢價分別係0.7%與負0.3%，尚有生存機會。但賭末日輪，心理壓力大，且交投唔多，無謂多手。
中石化C輪正路之選係9389，6月初夠鐘，輪價79仙，溢價2.6%，槓桿率5.8倍（有效4.5倍），引伸波幅40.2%。不過又係嗰句，中石化未調整得夠，𠵱家買C輪，風險仍大，值博率唔高，再等多陣至考慮。
章盛