點為之對狗狗好？買好嘢畀佢食？晚晚帶佢落街玩？
當然重要關心佢健康啦。人要調理腸胃，狗亦一樣。狗仔有甚麼消化不良、頭暈身熱，身為主人大多會帶牠看獸醫，但用中藥醫理食湯藥、下針灸和按摩，一樣可以幫到狗仔，你會話：中藥咁苦涼茶咁淡，狗仔點會肯食？𠵱家即刻測試，話你知，狗仔飲涼茶重快過小朋友！
記者：馬靜兒
攝影：周旭文
Model：Isis（BabyBlue）
試藥敢死隊
Coffee
品種：金毛尋回犬
性別：男
年齡：2歲半
醫師話：
金毛尋回犬容易盤骨有事，最好每年給牠照X光。
妹妹
品種：松鼠狗
性別：女
年齡：1歲半
醫師話：
松鼠狗易有氣管問題，年紀大了容易患心臟病。
檢查—先Check牙脷嘴
狗仔有病，主人會帶牠看獸醫，但想調理身體又點？睇中醫囉！中藥可改善其胃口和呼吸系統等毛病，皮膚病就可以幫牠浸中藥或敷中藥。大細狗都得，今日我哋就搵來兩隻無病無痛的狗仔看中醫，兼試飲涼茶。
檢查開始，中醫顧問曉飛大師會先聽聽狗仔的心肺跳動，再檢查舌頭、牙齒，看牠有否口臭，再摸骨看有否骨折。妹妹飲食有問題，不吸收，較同齡的松鼠狗瘦弱，毛色稀疏，欠缺光澤；而大狗Coffee就過度活躍，但毛色暗啞。
按摩 —狗不再高竇
咪以為得你愛按摩，其實不論大狗或細狗，無一不愛。醫師說，狗仔如有食滯、風濕、關節炎或消化不良都可以按摩，按摩可以增加血液循環和免疫力。一按之下，妹妹由本來的高竇冷漠，即時變得跟大師有交流。
針灸—好狗不怕針
一般狗隻有不良行的情況，都可以利用針灸治療。去睇親中醫總見到有人怕針。嗱，你睇吓，做人分分鐘唔夠狗仔大膽，事關狗仔唔怕大長針，加上師傅落針準，落咗針狗仔都唔覺。
涼茶—大狗鍾意飲
究竟人飲涼茶和狗飲涼茶有何分別，大師話份量不同。因為狗仔不喜歡飲苦味，為了𠱁狗仔飲，就要多加一點紅棗或蜜棗，等佢哋容易入口啲！
動物中醫小知識
一.人減肥要節食，狗仔減肥有何方法？
答：山楂、草決明和澤瀉是狗仔減肥的湯藥。
二.怎樣才可令狗毛看起來有光澤？
答：何首烏、靈芝、淮山和芡實煲成的湯藥對狗仔有美毛作用。
三.吃甚麼對狗仔的牙齒有益？
答：淮山、兔絲子和桑寄生都對狗仔的牙有益。（由於用藥份量好重要，如何用藥還是建議由中醫決定。）
香港中醫動物醫院（68323323）
地址：灣仔克街5號展鴻大廈1樓B室
收費：顧問費$180-250、藥材$50/日、針灸治療$250、穴位推拿$200