大市昨日跌得頗急，市場似乎擔心美國通脹，暫時唔會停止加息，搞到好多炒到㷫烚烚嘅股份即刻煞車。但經紀黃話好多股份剛剛開始熱身，斷估未有咁快就收工唔玩。
經紀黃話，好似麗新發展（488）呢系股票去年重組完成，股價較資產淨值有大折讓，成為炒賣點。其實呢系股票近排全線蠢動，而麗新國際（191）較值得留意，皆因近排老虎仔的遠東發展（035）大手減持，但與此同時卻有基金進場，密密增持。
由於麗國的街貨由老友手上轉到基金手裏，投資者對該股的信心肯定大增，因此麗國可以睇高一線，繼續炒股價較資產值有大折讓的概念。
睇番資料，遠展近排以0.62元減持麗國32球，持股量家陣低於5％，而有個對沖基金則增持至6％。
麗國昨日跌1.69％，收0.58元，成交股數7862萬股，金額4575萬元。
慕容小初