發展商開盤前做推廣，渠道唔少，軟銷硬銷都得。嘉里何文田灝畋峰，就選擇軟銷。
蘭西噚日收到佢哋嘅《臻善譜》，裏面介紹何文田新地標，提到區內名校林立，好似九龍華仁、拔萃男女、培正等等。諾貝爾物理學獎得主崔琦，同菲爾滋數學獎得主丘成桐，都出自呢區。
講完一大輪，進入戲肉樓盤介紹，包括一望無際嘅景觀，闊銀幕式窗戶同優質管理等。
蘭西記得，之前收過嘅《臻善譜》，都有文章介紹何文田歷史。啲人睇完，好自然會入腦，印象深刻，對個盤好感大增，第日發展商有賣樓，咪會諗吓入市囉。
灝畋峰共六十九伙，分二千餘及二千三百餘呎兩類，另有三個頂層全層，三千八百至四千二呎，預計復活節現樓發售。