食環處：爆　本地居食屋充闊佬　豬肝代鵝肝

收到風銅鑼灣新開咗間中式居食屋，以中華便食代替日式小吃，重話用豬肝代替平時食開嘅貴價鵝肝！聽落個心即時打個突，水準同賣相得唔得㗎？好彩經過明查暗訪，發現主攻小食嘅「煮館」，唔係話求其塞碟牛丸、魚蛋或魷魚絲出嚟敷衍食客嗰種，相反樣樣小食賣相精緻兼創意爆燈，啱晒多心又嘴刁嘅你同我，屁股未坐暖已經忍唔住嗌番幾碟大快朵頤，以後行經呢頭咪多個地方坐低Hea囉！

記者：盧家蕙攝影：黃子偉
Model：Becky、Tania@Salvador

糯米飯或者pizza就食得多，估唔到用糯米都可以做pizza「餅」底！口感煙韌盞鬼，配上番薯粒、香芋粒、蛋絲、蟹柳絲及蟹子，餡料豐富又搶眼，嚼勁十足，廿幾蚊就食到手掌般大的pizza，抵食啦！

春卷包住多款餡料：韭菜、椰菜、蝦肉、豬肉碎及綠豆，一咬就知係用心之作，卜卜脆加皮薄餡靚，佐飯或當小食都得。

賣相別致的多士，以為$48有矜貴鵝肝鋪面，食落先知係豬肝！不過唔好失望住，多士塗上沙律醬及果醬，再夾住鬆化的黃沙豬肝，口味創新又易入口，值得一試㗎。

「煮館」諧音「主管」，以「煮」為名，擺明對自家烹調技巧充滿信心；作為出品部「主管」的鄭師傅話：「想當年我就係憑一碗手打雲吞麵，喺旅遊發展局舉辦嘅第一屆美食選拔賽入面，奪得香港美食嘅最高榮譽大獎。」聽落確實係威係勢，但今時今日要喺飲食界打穩陣腳亦唔容易，師傅的策略係：「大膽的試，小心的改。」聽落好玄，但嗒落有理喎。

■環境細細，人多時稍嫌侷促，但勝在夠warm。

行型格摩登路線的煮館，餐牌有齊粥粉麵飯四寶，但賣點卻是多款份量輕巧的輕便小食。劉經理指出：「我哋打正旗號以中華便食做主打，記得幾年前流行所謂Fusion菜，亂作一堆又叫做新菜式，根本欠缺重點。我哋嘅食物賣相似西式，食材同烹調手法都係中式，器具、裝潢就似足日式，感覺正常好多。」大包圍有齊中、西、日三式，潮食一族撐硬。

■抬頭一望，整排西式木製吊飾首先映入眼簾，配埋中式砂鍋陣同日式餐具，裝潢都玩埋fusion。

■煮館提供多款麵食（由上至下）：廣東銀絲蛋麵、口感潤滑而且麵香四溢的獨家台灣掛麵、雲南特色米線、低熱量及零膽固醇的健康日本蒟蒻麵。