下個星期三,即係八號,係立法會狗年第一個大會,當日嘅議程認真精采,三個動議辯論分別係西九、東江水同港台檢討,個個都係重頭戲。尤其西九壇嘢,主事人肥龍至今都冇正面交代過,究竟計劃何去何從,睇怕佢嗰日都應該開吓口啩。
不過,西九小組主席傑哥對肥龍出席立法會答西九唔使有太大寄望,事關嗰日對四八年出生、屬鼠嘅肥龍嚟講有特別意思。何解?因為二月八日係佢五十八歲牛一。做壽星公,應該賀一賀佢至啱,如果落立法會,實俾人質到暈,歎慣玩慣嘅肥龍,睇怕都唔會咁樣折磨自己啩。
咁計法,佢去立會機會都好細吓,分分鐘叫孫公去頂住就算數。八方估,肥龍發夢都冇諗過五十八歲生日時,會做咗特區第二號人物、政務司司長咁巴閉。佢當然最鍾意係做馬會董事,入吓馬場頒吓獎(年初三佢喺馬場又真係好受馬迷歡迎,老董就被人噓到唔敢去);或者陪老婆四圍去聽歌劇,食美國牛扒同黃油蟹。
煲呔唔交人家變都有份
𠵱家朝朝晨早要起身,去禮賓府同煲呔開會,又要喺政府總部坐鎮,生日重要去立法會對住四大狀、長毛、馬丁、卿姐同達仔班「反對黨」,重有乜好慶祝呀?
最近有人傳,○七年如果冇人夠班做政務司司長,肥龍可以冧莊,講呢番言論嘅人可能唔熟肥龍,因為佢老哥嘅生日願望,係早走早着,捱義氣頂埋呢一年,幫煲呔搞掂埋競逐連任就收工。箇中原因,相信同許太有關,煲呔如果唔交人,家變都有份!肥龍點敢唔走?另外,政改出師不利,佢都冇面目見江東父老,橋王招牌一上場就俾人拆咗,重邊有癮留低。
肥龍實在一副死膽,而且懶過條蛇,原來立法會西九小組早前叫過肥龍出席今日會議,講最新進展,點知肥龍都話冇需要,噚晚政府重出稿,話需時研究入圍財團嘅疑問,等行會有結論,肥龍自然會現身。傑哥同班委員當然俾佢激到紮紮跳,即時叫秘書處整份研究文件,睇睇過往有幾多官員會拒絕出席會議,據知真係唔多,肥龍等住俾尊貴議員們開年啦。
爆料熱線:29290000、27860099
報料傳真:26239278
報料電郵:[email protected]