農曆新年過後，相信都收到唔少賀年禮盒，當中重有好多係鐵罐包裝，若然就咁丟咗個鐵罐的話，未免浪費重好唔環保！其實，只要大家花點心思同創意，原本當作廢物的鐵罐，撚幾撚轉個手，可變身成美化家居的裝飾品，橫掂時下唔少潮流家品都興玩Metal，夠晒In！
記者：陳偉林
攝影：何家亮、林栢鈞
餅罐X壁燈夠玩嘢
除咗一般吊燈外，唔少人的屋企都有用壁燈，照明之餘，亦可視為一款裝飾品；查實，有時揭開啲家居雜誌，又或者行經燈飾舖，發現唔少燈飾都係鐵片做，充滿CyberFeel又夠型仔，既然呢排收唔少鐵罐禮盒，於是腦筋一轉，將鐵罐改裝成獨一無二的掛牆燈飾，唔單止可以廢物利用，又能夠發揮到你的藝術天份；又或者，遇着啲圖案設計過癮嘅鐵罐，索性唔使加工包裝，用番鐵罐本身嘅圖案做DieCut，好似呢個克力架餅乾罐，原汁原味！
材料
克力架餅罐1個
吊燈連燈座1套$40
40-60W燈泡1個$40
牛油紙1卷$10
螺絲釘1盒$10
雙面膠紙1卷$5
步驟
小秘技
1.罐面勾出的圖案周邊，記緊用木工幼砂紙或手電鑽打磨至平滑，免𠝹損手。
2.為防長時間開燈會過熱，不妨在鐵罐頂部多開幾個小孔散熱。
3.若果買唔到連接三腳插頭的燈座，可以吊燈燈座改裝，但需要將電線轉換至附設有保險絲的三腳插頭。
砌磚扮藝術品
禮盒鐵罐唔單止可以DIY做壁燈，不如跟風學人熱玩馬賽克，拼砌出自家風格的掛牆裝飾品，夠特別之餘又有睇頭同新意；齋鋪磚仔都已經好有藝術Feel，黐埋發泡膠板做間隔，重可以做埋飾物掛架，美觀又實用。
材料
大號裝曲奇餅罐1個
小瓷磚（多色）$40（1件約150小塊）
瓷磚專用膠水1支$30-$40
瓷磚專用鉗1把$40
高密度發泡膠板1塊$35
步驟
小秘技
1.由於馬賽克掛飾有一定重量，不宜選用自動黏貼掛鈎，以螺絲鑲緊在牆上較為適合。
2.用高密度發泡膠板較飛機木好，因易於剪裁，可用萬能膠水黏合。
𠝹窿做紙巾盒話咁易
市面上有唔少糖果商，以吸引小朋友為目標，包裝都設計得美輪美奐，大部份都印上卡通公仔，靚到真係唔捨得丟，但就咁放埋一邊，搞到屋企又多件垃圾；撞啱個鐵罐Size放得落卷廁紙，索性將個罐改裝成紙巾盒，諗落重可以𠱁小朋友，比如話「想唔想喺個咁得意嘅盒度攞紙巾用呢？咁就要勤啲洗手洗手，保持個人衞生喇！」
材料
直徑15cm圓罐1個
步驟
小秘技
1.用刀尖幼長的鉸剪，比廚房用的鉸剪更易將鐵罐蓋剪裁出圓形。
2.用手電鑽打磨開口位較用木工砂紙慳力又省時，大型五金舖有售，1把約$65。