大狀黨余若薇、民主黨李華明、職工盟李卓人、自由黨張宇人同民建聯劉江華，噚日喺港台嘅「撮合」下一齊打邊爐食開年飯。五個議員就藉啲食物寸嚟寸去，李卓人率先請張宇人食蝦丸，希望張宇人呢啲話「員工打工都有風險」嘅口臭飲食界，「新一年就唔好再蝦打工仔」。
民主女神就夾咗件芋絲畀劉江華食，因為芋絲係由粉絲紮成，民建聯好應同民主派團結一齊爭普選啦！肥仔明就醒隻蝦益劉江華，寸民建聯係大頭蝦，連爭取○七、○八年雙普選嘅黨綱都唔記得晒！劉江華還擊話，民主派就唔應該獨沽一味，應該乜都要食吓，唔好淨係掛住民主，其他民生都好重要。張宇人就寸番李卓人話，嗰啲最低工資、最高工時其實好似麻辣火鍋，食嗰吓好正，但落到肚就會搞到消化不良！
爆料熱線：29290000、27860099
報料傳真：26239278
報料電郵：[email protected]