一向喜愛釣魚的鍾鎮濤（阿B）與彭健新十分重視農曆新年，而且禁忌多多，除了要有錢壓袋之外，就連入廟拜神一樣多忌諱，原來阿B試過大年初一被廟祝鬧，感覺甚不吉利；健仔則惟恐擇錯時辰拜神，會拜正衰神！
鍾鎮濤與彭健新均酷愛釣魚，兩人經常相約享受釣魚樂，不過農曆年期間就會暫停，改玩鯉魚裝飾的彭健新說：「其實冇話規定幾時釣得幾時唔釣得嘅，釣到魚嘅話咪同自己講年年有餘囉，不過我過年通常唔釣，但求心安啫。」
初一大團聚
阿B表示通常會選在年初一呼朋喚友，與家人開開心心吃飯，他說：「我最鍾意大年初一，一家人齊齊整整，叫埋班好朋友一齊食飯，感覺好開心好圓滿。」
睡衣袋銀紙
不少中國人選在大年初一拜神上頭炷香，阿B卻甚少參與，他解釋：「我好耐之前試過喺年初一同個朋友入廟拜神，我又唔識，跟住朋友行，人拜我又拜，但係我又唔知要畀利是個廟祝，結果俾個廟祝指住嚟鬧。大年初一就俾人鬧認真唔吉利，心情都差咗，所以我新年都好少去拜神。」
至於彭健新亦表示不會選在年初一上頭炷香，他說：「上頭炷香嘅時間要算得好準，唔同時辰會拜咗唔同嘅神，有啲時間拜神會拜咗衰神，我唔係好識呢啲嘢，所以都係唔做唔錯。」
往年年初一，彭健新要返電視城向六叔（邵逸夫）拜年，今年改為年初二開工，故初一有空陪伴家人，他說：「我每年年三十晚瞓覺前都會放叠銀紙喺睡衣嘅衫袋，初一瞓醒就摸到錢，哈哈！」
採訪：蔡如玉
攝影：陳慧安
