隔晚杜指起89點，是日日股又大升，港股冇跟到，恒指跌50點。港股高位有回吐，尤其係H股，唔出奇，炒家肥肥白白，袋真錢落袋，然後又搵過啲落後股玩過。
兩個禮拜前，日經指數低過恒指少少，現時則高過恒指1019點。遲吓，恒指有機會追番貼啲，要靠最重磅嗰幾隻，例如滙控（005）、中移動（941）、和黃（013）等。
建行C輪9978：建行（939）全日好穩定，高低價相差5仙，平收3.075元。連續3日，建行每日成交金額都超過9億，任何時間每個價位都有幾十球買盤，收集意向明顯，近期新高3.10元，更高啲價位在後頭。C輪昨日下跌，更加買得過。
9978收47.5仙，跌7%，到咗再上車理想時機。隻輪6月初到期，溢價0.3%，槓桿率6.5倍（有效6.4倍）。正股上到3.30元，隻輪值69仙。
建行C輪2104：2104收36仙，跌3%。想搏殺少少，揀呢隻，爆炸力大啲。建行熱門C輪，要溢價唔高而槓桿率8倍以上，得隻2104。
隻輪6月初夠鐘，溢價1.1%，槓桿率8.5倍（有效8.15倍），引伸波幅12.8%。正股上到3.30元，隻輪值55仙，升幅大過9978。
章盛