紫微Y話狗年遷移宮內有陀羅星，主旅遊遷移有阻滯（見昨日本欄），估唔到言猶在耳，香港一旅行團新年到埃及旅行，竟於年初三下午一時（香港時間屬凶時）遇上車禍，據報十四死三十傷。未到立春，旅遊已有禍事，希望紫微Y唔好咁準！
本來想寫車公靈簽嘅，執筆之時，睇到有埃及車禍新聞，故此加上前文一段。車公廟靈簽通常好有預測性，○三年何局長求得下簽，是年竟有沙士害人。○四年劉皇發求得第七十六中簽，簽云：「人情反覆似波濤，勿謂金蘭結義高，上古守朋今重利，囊空不見舊同袍」。到咗○五年初，董特首就領會到「人情反覆似波濤，勿謂金蘭結義高」嘅滋味，雖然銀紙大把，不致囊空，但被迫以身體理由辭職，真係唔見晒「舊同袍」，○五年農曆年劉皇發求得第十三中簽：「持齋受戒須精致，盛積爐煙薦聖賢，香火滿堂皆顯應，何勞經卷往西天」，當時大家認為和尚（僧人）受戒，唐僧不須往西天取經，人人估曾蔭權做特首，唐英年無望，結果全部中晒。
今年劉皇發求得第七十五上簽喎。「肆業求謀各有方，朝為田舍暮為皇，田可耕時書可讀，自然利就有名揚。」個個話好。睇真啲，好就係好，不過唔係好得咁緊要，只係大家如果努力讀書做事嘅話，可以搵到飯食咁解，千祈唔好以為可以靠炒發達，你唔肯耕田（努力做事咁解），又唔肯讀書（研究、進修、終身學習），點會「求謀有方」吖。至於耕田讀書，就有利就名揚，無非係古人勉勵子孫之詞，所謂書中自有顏如玉，書中自有黃金屋吖嘛，信吓無妨，不必太過天真。
年初二係車公誕，香港習俗係到年初三赤口日先至到車公上香求簽，今年超過十萬人到車公廟，人龍最遠排到去大圍，廟內必定擠逼到極，想搵個簽筒求番枝簽都好艱難，故此左丁山例必在年初三去馬場，唔去車公廟，新春正月頭，揀番個吉日吉時去拜車公，就唔使同人逼嘞。